సారథి న్యూస్, హైదరాబాద్: హైదరాబాద్లో పరువు హత్య తీవ్ర సంచలనంగా మారింది. కూతురు వేరే కులం యువకుడిని పెళ్లి చేసుకుందని తండ్రి సదరు యువకుడిని దారుణంగా హత్యచేయించాడు. సుఫారి గ్యాంగ్ ఈ హత్యకు పాల్పడ్డట్టు సమాచారం. ఇందుకు సంబంధించిన వివరాలు.. సంగారెడ్డికి చెందిన లక్ష్మారెడ్డి కుటుంబం చందానగర్లో నివాసం ఉంటోంది. లక్ష్మారెడ్డి కూతురు అవంతి, అదే ప్రాంతానికి చెందిన హేమంత్ ప్రేమించుకున్నారు. ప్రేమపెళ్లికి పెద్దలు అంగీకరించకపోవడంతో గత జూన్10న ఇంట్లో నుంచి పారిపోయి పెళ్లిచేసుకున్నారు. అనంతరం హేమంత్, అవంతి గచ్చిబౌలిలోని టీఎన్జీవో కాలనీలో నివాసం ఉంటున్నారు.
అయితే గురువారం అవంతి, హేమంత్ వద్దకు అవంతి బంధువులు వచ్చారు. అవంతి అక్కలు, బావలు, వదినలు వచ్చారు. అయితే ఇంటికి వెళ్థామంటూ ఈ జంటను బంధువులు తమ కార్లలో తీసుకెళ్లారు. అయితే కారు ఎక్కాక బంధువుల ప్రవర్తన చూసి హేమంత్కు అనుమానం వచ్చింది. అనంతరం వారు కారులో హేమంత్ను చితకబాదారు. కొంతదూరం వెళ్లాక అవంతిక, హేమంత్ కారునుంచి బలవంతంగా దిగారు. పారిపోయేందుకు యత్నించారు. అయితే అవంతికి తప్పించుకోగా.. హేమంత్ మాత్రం బంధువులకు దొరికాడు. దీంతో అతడిని వారు తీసుకెళ్లారు. అయితే అవంతిక, హేమంత్ తల్లిదండ్రులు పోలీసులకు ఫిర్యాదు చేసినప్పటికీ పట్టించుకోలేదన్న ఆరోపణలు వినిపిస్తున్నాయి.
శుక్రవారం సంగారెడ్డిలో హేమంత్ మృతదేహం లభ్యమైంది. హేమంత్ను ఉరివేసి చంపినట్టు సమాచారం. ఈ హత్యలో అవంతి మేనమామ కూడా పాలుపంచుకున్నట్టు పోలీసులు అనుమానిస్తున్నారు. ప్రస్తుతం అవంతి తల్లిదండ్రులను పోలీసులు అదుపులోకి తీసుకున్నట్టు సమాచారం. అవంతిక మేనమామ యుగంధర్రెడ్డి ఈ హత్యలో కీలకంగా వ్యవహరించినట్టు పోలీసులు భావిస్తున్నారు. పోలీసులు హేమంత్ మృతదేహాన్ని స్వాధీనం చేసుకుని ఉస్మానియా దవాఖానకు పోస్ట్మార్టం కోసం తరలించారు. పోస్ట్మార్టం తర్వాత పూర్తివివరాలు వెలుగులోకి వచ్చే అవకాశం ఉంది.
