ప్రపంచాన్ని గడగడలాడిస్తున్న కరోనా మహమ్మారిని అరికట్టేందుకు మరో పవర్ఫుల్ వ్యాక్సిన్ రాబోతున్నది. ప్రస్తుతం చివరి అంటే మూడో దశ క్లినికల్ ట్రయల్స్ పూర్తిచేసుకున్న ఈ వ్యాక్సిన్ ఈ ఏడాది చివరినాటికే అందుబాటులోకి రానున్నట్టు సమాచారం. ఈ వ్యాక్సిన్ను ప్రముఖ సంస్థ జాన్సన్ & జాన్సన్ తయారు చేస్తున్నది. అయితే ఈ వ్యాక్సిన్ కేవలం ఒక్కడోసు వేసుకుంటే సరిపోతుందని కంపెనీ ప్రతినిధులు చెబుతున్నారు. ఇప్పటికే అభివృద్ధి చేస్తున్న చాలా వ్యాక్సిన్లు రెండు డోసుల వేసుకోవాల్సి ఉన్నది. అయితే జాన్సన్ & జాన్సన్ ఒక్క డోసు మాత్రమే సరిపోతుందని సమాచారం. ఈ వ్యాక్సిన్పై ఇప్పటి వరకు జరిగిన అనేక ట్రయల్స్ సత్ఫలితాలు ఇచ్చాయట. ఇప్పటికే 60 వేలమంది వలంటీర్లకు టీకాను ఇవ్వగా వారంతా ఎంతో ఆరోగ్యంగా ఉన్నారని.. వారి శరీరంలో కావాల్సిన సంఖ్యలో యాంటీ బాడీస్ ఉత్పత్తి అయ్యాయని కంపెనీ చెబుతున్నది. అమెరికాతో పాటు దక్షిణాఫ్రికా, అర్జెంటీనా, బ్రెజిల్, చిలీ, కొలంబియా, మెక్సికో, పెరూ దేశాల్లో ప్రస్తుతం విస్తృతంగా క్లినికల్ ట్రయల్స్ కొనసాగుతున్నాయి. ఒకే ఒక్క డోసుతో కొవిడ్‌-19 నుంచి రక్షణ కల్పించగల సామర్థ్యం ఉన్న ఈ వ్యాక్సిన్ను ఇవ్వడం ద్వారా రోగనిరోధక శక్తి అభివృద్ధి చెందుతుంది. ఈ ఏడాది చివరి నాటికి ఈ టీకాపై పూర్తిస్థాయి సమచారం అందుబాటులోకి వస్తుందని కంపెనీ చీఫ్ సైంటిఫిక్ ఆఫీసర్ డాక్టర్ పాల్ స్టాఫ్ఫెల్ చెప్పారు.
