సారథి న్యూస్, హైదరాబాద్: గ్రేటర్ హైదరాబాద్ పరిధిలో ప్రతిరోజు వందల సంఖ్యలో కరోనా పాజిటివ్ కేసులు నమోదవుతుండడం కొంత ఆందోళన కలిగిస్తోంది. ఈ నేపథ్యంలో మరోసారి లాక్ డౌన్ విధించాలని రాష్ట్ర వైద్యారోగ్యశాఖ ప్రతిపాదనలను రాష్ట్ర ప్రభుత్వం పరిశీలిస్తోంది. కేబినెట్లో చర్చించి దీనిపై రెండుమూడు రోజుల్లో నిర్ణయం తీసుకుంటామని కూడా సీఎం కేసీఆర్ ఇది వరకే ప్రకటించారు. ప్రస్తుత పరిస్థితుల్లో లాక్డౌన్విధించడమే పరిష్కారమని అన్ని వర్గాల నుంచి అభిప్రాయం వ్యక్తమవుతుండడంతో హైదరాబాద్లో ఉద్యోగాలు, ఉపాధి కోసం నివాసం ఉంటున్న వాళ్లు సొంతూళ్లకు వెళ్లేందుకు రెడీ అవుతున్నారు.
ఎలాగూ పోటీ పరీక్షలైన ఎంసెట్, పాలిసెట్, ఐసెట్, లాసెట్, పీజీఎల్ సెట్, పీఈసెట్, ఎడ్ సెట్ కూడా వాయిదాపడడంతో సొంత ప్రాంతానికే వెళ్తే బెటరని చాలా మంది భావిస్తున్నారు. ఈ క్రమంలో ఆంధ్ర, రాయలసీమ ప్రాంతాలకు చెందినవాళ్లు పయనమవుతున్నారు. రెండు మూడు రోజులుగా బస్సులు, రోడ్లపై కూడా రద్దీ కూడా బాగా పెరిగింది. దీంతో హైదరాబాద్- విజయవాడ, హైదరాబాద్–బెంగళూరు జాతీయ రహదారిపై ట్రాఫిక్ జామ్ అయింది. అటు ఎల్బీనగర్, ఇటు అరాంఘర్చౌరస్తా వద్ద బస్సులు, ఇతర వాహనాల కోసం పడిగాపులు గాస్తున్నారు. మరోవైపు రాష్ట్రంలోకి ప్రవేశించడానికి సాయంత్రం 7 గంటల వరకే అనుమతి ఉండడంతో తెలంగాణ, ఏపీ సరిహద్దు వద్ద అధికారులు వాహనాలను నిలిపివేస్తుండడంతో వాహనదారుల్లో టెన్షన్ నెలకొంది.
