అమరావతి: ఆంధ్రప్రదేశ్లో రాజకీయాలు వేడెక్కాయి. ప్రస్తుతం రమేశ్ ఆస్పత్రి, స్వర్ణప్యాలెస్ అగ్నిప్రమాదంపై అధికార ప్రతిపక్షాలు దుమ్మెత్తి పోసుకుంటున్నాయి. రమేశ్ ఆస్పత్రి కరోనా పేషెంట్లను స్వర్ణప్యాలెస్ హోటల్లో ఉంచి చికిత్స అందించింది. ఈ క్రమంలో అగ్నిప్రమాదం జరిగి అందులో ఉన్న 10 మంది చనిపోయారు. ఈ ఘటనపై ప్రభుత్వం విచారణకు ఆదేశించింది. కాగా, రమేశ్ ఆస్పత్రి యజమాని రమేశ్బాబు పరారీలో ఉన్నాడు. రమేశ్ బాబు కమ్మ సామాజిక వర్గానికి చెందినవాడు కాబట్టి ప్రభుత్వం కక్ష గట్టిందని.. ప్రతిపక్ష టీడీపీ ఆరోపిస్తోంది. అందుకు వైఎస్సార్సీపీ కూడా గట్టిగానే కౌంటర్ ఇచ్చింది. రమేశ్బాబు ఏ తప్పు చేయనప్పడు పరారీలో ఎందుకు ఉన్నాడని ప్రశ్నిస్తోంది. టీడీపీ నేతలు, వారి అనుకూల మీడియా రమేశ్ ఆస్పత్రి యాజమాన్యాన్ని కాపాడేందుకు యత్నిస్తోందని వారు ఆరోపిస్తున్నారు. ఎవరెన్ని ఒత్తిళ్లు చేసినా రమేశ్ ఆస్పత్రిపై చర్యలు తప్పవని వారు హెచ్చరిస్తున్నారు.
కాగా, విశాఖలో అగ్నిప్రమాదం జరిగినప్పడు బాధ్యులపై చర్యలు తీసుకోవాలిన డిమాండ్ చేసిన ప్రతిపక్ష నేత చంద్రబాబు.. స్వర్ణప్యాలెస్ ఘటనపై ఎందుకు మౌనంగా ఉన్నారని వైఎస్సార్సీపీ నేతలు ప్రశ్నిస్తున్నారు. స్వర్ణప్యాలెస్ యజమాని తమవాడు కాబట్టే.. ఈ ఘటనపై టీడీపీ నేతలు నోరు మెదపడం లేదని వారు ఆరోపిస్తున్నారు. మరోవైపు రమేశ్బాబు సమీప బంధువు సినీహీరో రామ్ వైఎస్సార్సీపీ ప్రభుత్వానికి వ్యతిరేకంగా ట్వీట్లు చేశాడు. ఈ ట్వీట్లు సంచలనంగా మారాయి. హీరోరామ్పై వైఎస్సార్సీపీ అభిమానులు, సోషల్మీడియా విభాగం తీవ్రంగా విరుచుకుపడుతోంది. స్వర్ణప్యాలెస్లో 10 మంది చనిపోతే స్పందించని రామ్ తన బంధువును కాపాడేందుకు ప్రభుత్వంపై విమర్శలు చేస్తున్నారని వారు మండిపడుతున్నారు. ఏది ఏమైనప్పటికీ ప్రభుత్వం స్వర్ణప్యాలెస్ ఘటనపై విచారణ చేపడుతుందని.. బాధ్యులు ఎంతటి వారైనా వదిలే ప్రస్తక్తే లేదని ఏపీ ప్రభుత్వ పెద్దలు పేర్కొంటున్నారు. ఈ ఘటన ఇంకెన్ని మలుపులు తిరుగుతుందో వేచిచూడాలి.
