సంచలన దర్శకుడు రాంగోపాల్ వర్మకు నల్లగొండ జిల్లా ఎస్సీ, ఎస్టీ కోర్టు షాక్ ఇచ్చింది. రాష్ట్ర వ్యాప్తంగా సంచలనం సృష్టించిన ప్రణయ్ హత్యను ఇతివృత్తంగా తీసుకొని రాంగోపాల్వర్మ.. మర్డర్ అనే సినిమాను తెరకెక్కిస్తున్నాడు. ‘మర్డర్’ సినిమా తన కుమారుడి హత్యకేసు విచారణను ప్రభావితం చేస్తుందని.. అందువల్ల సినిమా విడుదలను నిలిపివేయాలని ప్రణయ్ తండ్రి కోర్టును ఆశ్రయించారు. విచారణ చేపట్టిన నల్లగొండ జిల్లా ఎస్సీ, ఎస్టీ కోర్డు ఈ విచారణ పూర్తయ్యేవరకు ‘మర్డర్’ సినిమాను విడుదల చేయొద్దని సోమవారం మధ్యంతర ఉత్తర్వులు జారీచేసింది. ఈ చిత్రం విచారణపై ప్రభావం చూపే అవకాశం ఉన్నదని కోర్టు అభిప్రాయపడింది. నల్లగొండ జిల్లా మిర్యాల‌గూడ‌లో రెండేళ్ల క్రితం పెరుమాళ్ల ప్రణయ్ అనే యువ‌కుడు హ‌త్య‌కు గురయ్యాడు. ఇది ప‌రువు హ‌త్య. అప్ప‌ట్లో ఈ హ‌త్య తీవ్ర సంచలనం క‌లిగించింది. ఈ కేసులో ప్ర‌ధాన నిందితుడైన అమృత తండ్రి మారుతీరావు కూడా ఇటీవ‌ల ఆత్మ‌హ‌త్య‌కు పాల్ప‌డ్డాడు. ద‌ళిత యువ‌కుడైన ప్రణయ్ హత్యను క‌థా వ‌స్తువు చేసుకుని వర్మ ‘మర్డర్’ సినిమాను తెర‌కెక్కిస్తున్నారు. కోర్టు తీర్పుపై ఆర్జీవీ ఇంకా స్పందించలేదు.
