న్యూఢిల్లీ: ఐపీఎల్లో సన్ రైజర్స్ హైదరాబాద్కు ఆడడమే తన కెరీర్లో పెద్దమలుపు అని టీమిండియా స్టార్ పేసర్ భువనేశ్వర్ అన్నాడు. డెత్ ఓవర్లలో ఒత్తిడిని జయించడం నేర్చుకున్నానని చెప్పాడు. ‘యార్కర్లు సంధించే నైపుణ్యం నాకు ఎప్పుడూ ఉంది. మధ్యలో కాస్త తగ్గినా మళ్లీ నేర్చుకున్నా. సన్ రైజర్స్ హైదరాబాద్ కు మారిన తర్వాత ఇన్నింగ్స్ మొదట, చివర బౌలింగ్ చేసే అవకాశం వచ్చింది. 2014లో ఆ ఫ్రాంచైజీ తరఫున 14 మ్యాచ్లు ఆడాను. దీంతో స్లాగ్ ఓవర్లలో ఒత్తిడిని ఎలా అధిగమించాలో నేర్చుకునే అవకాశం దక్కింది. అదే నా కెరీర్కు పెద్దమలుపు’ అని భువనేశ్వర్ పేర్కొన్నాడు.
మాజీ కెప్టెన్ మహేంద్ర సింగ్ ధోనీలాగా ఫలితంతో సంబంధం లేకుండా ఆడితే బాగా విజయవంతం కావొచ్చన్నాడు. ఈ విషయం తన కెరీర్లో రుజువైందని కూడా చెప్పాడు. కరోనా లాక్ డౌన్లో జీవితం చాలా కష్టంగా గడిచిందని భువీ వెల్లడించాడు. ‘తొలి 15 రోజులు పెద్దగా ఇబ్బంది కాలేదు. నన్ను నేను ప్రోత్సహించుకున్నా. కానీ రానురాను గడ్డు పరిస్థితులు తలెత్తాయి. బయటకు వెళ్లడానికి వీల్లేదు. కసరత్తులు చేసేందుకు ఇంట్లో సామగ్రి లేదు. ఏం చేయాలో తోచలేదు. లాక్డౌన్ ఎన్ని రోజులు ఉంటుందో కూడా తెలియదు. అందుకే 15 రోజుల తర్వాత ఎక్సర్ సైజ్ పరికరాలు తెప్పించుకుని ఇంట్లోనే కసరత్తులు చేశాను. దీని నుంచి కొద్దిగా ఉపశమనం కలిగింది. బౌలింగ్ ప్రాక్టీస్ లేకపోవడంతో.. ఫిట్నెస్పై దృష్టిపెట్టా’ అని భువీ వ్యాఖ్యానించాడు. 2013 నుంచి ఐసీసీ ట్రోఫీలు గెలువకపోవడానికి ప్రత్యేకమైన కారణాలేమీ లేవని చెప్పాడు.
