- కాంగ్రెస్, బీజేపీ మోసం చేశాయి
- కమిటీలతో కాలయాపన చేశాయి..
- నన్ను గెలిపిస్తే పార్లమెంట్లో కొట్లాడతా..
- నాగర్కర్నూల్ బీఆర్ఎస్ ఎంపీ అభ్యర్థి డాక్టర్ ఆర్ఎస్ ప్రవీణ్కుమార్
సామాజికసారథి, నాగర్ కర్నూల్ బ్యూరో: ఎస్సీ వర్గీకరణపై నాగర్ కర్నూల్ బీఆర్ఎస్ ఎంపీ అభ్యర్థి డాక్టర్ ఆర్ఎస్ ప్రవీణ్ కుమార్ స్పందించారు. ఎస్సీలను కాంగ్రెస్, బీజేపీలు మోసం చేశాయని విమర్శించారు. శనివారం ఆయన నాగర్ కర్నూల్ జిల్లా బిజినేపల్లిలో మీడియాతో మాట్లాడారు. బీజేపీకి చిత్తశుద్ధి ఉంటే పదేళ్లలో ప్రధాని నరేంద్రమోడీ ఎందుకు మాట్లాడలేదని ప్రశ్నించారు. కనీసం ఒక ఆర్డినెన్స్ ను కూడా తీసుకురాలేకపోయారని అన్నారు. బీజేపీ అధికారంలో ఉన్న రాష్ట్రాల్లో ఎస్సీ వర్గీకరణ చేశారా? ప్రజలకు చెప్పాలని డిమాండ్ చేశారు. నవంబర్ లో మందకృష్ణ మాదిగ నాయకత్వంలో హైదరాబాద్ లో ఓ మీటింగ్ జరిగిన తర్వాత ఓ కమిటీ వేస్తున్నామని మోడీ చెప్పారని గుర్తుచేశారు. నాడు కాంగ్రెస్ ఉషా మెహ్రా కమిటీ వేసిందని, నేడు బీజేపీ కూడా కమిటీ వేసి కాలయాపన చేస్తోందని మండిపడ్డారు. మాలలు, మాదిగలను ఆ రెండు పార్టీలు మోసం చేస్తున్నాయని అన్నారు. బీఆర్ఎస్ 2015లోనే అప్పటి సీఎం కేసీఆర్ నాయకత్వంలో వర్గీకరణ కోసం అసెంబ్లీలో ఏకగ్రీవ తీర్మానం చేసి కేంద్ర ప్రభుత్వానికి పంపించిందని గుర్తుచేశారు. మాన్యశ్రీ కాన్షీరాం ఏ వర్గాలు ఎంత ఉంటాయో ఆ వర్గాలకు సంపద, రాజ్యాధికారంలో అంతే వాటా ఉండాలని అన్నారని గుర్తుచేశారు. తనను గెలిపిస్తే పార్లమెంట్ వేదికగా వర్గీకరణ కోసం కొట్లాడతానని స్పష్టంచేశారు. కేంద్రంలో ఉండే ప్రభుత్వాన్ని ముక్కుపిండి అయినా సరే అమలయ్యేలా చూస్తానని అన్నారు. సమావేశంలో పలువురు నాయకులు పాల్గొన్నారు.
