న్యూఢిల్లీ: రాజస్థాన్ రాజకీయాలు రోజుకో మలుపు తిరుగుతున్నాయి. సుప్రీం కోర్టులో వేసిన పిటిషన్ను రాజస్థాన్ స్పీకర్ సీపీ జోషి సోమవారం ఉపసంహరించుకున్నారు. సచిన్ పైలట్‌తో పాటు 18 మంది ఎమ్మెల్యేలపై స్పీకర్ అనర్హత వేటు వేసిన విషయం తెలిసిందే. కాగా పైలట్ వర్గం హైకోర్టును ఆశ్రయించగా కోర్టు స్టే విధించింది. దీంతో హైకోర్టు తీర్పును సవాల్చేస్తూ స్పీకర్ సుప్రీం కోర్టులో పిటిషన్ దాఖలు చేశారు. అయితే తాజాగా ఆయన తన పిటిషన్ను వెనక్కి తీసుకున్నారు.
రాజస్థాన్ సంక్షోభాన్ని ఎదుర్కొనేందుకు న్యాయ పోరాటం వద్దని.. రాజకీయంగానే ఎదుర్కోవాలని కాంగ్రెస్ అధిష్టానం తాజాగా ఓ నిర్ణయానికి వచ్చింది. ఈ నిర్ణయంతోనే స్పీకర్ ఈ పిటిషన్ను ఉపసంహరించుకున్నట్టు సమాచారం. ఈ అంశంపై చర్చ వచ్చినప్పుడు నాయకులు రెండుగా చీలిపోయినట్లు సమాచారం. కొందరు న్యాయపోరాటమే మంచిదని అభిప్రాయపడగా మెజార్టీ నాయకులు కేసును ఉపసంహరించుకుని, రాజకీయంగా ఎదుర్కోవడమే సరైన నిర్ణయమని తేల్చిచెప్పారు.
