సారథి న్యూస్, రామాయంపేట: ప్రస్తుతం వరిపంటకు మొగి పురుగు ఆశించిందని తగిన మందులు వాడి అరికట్టవచ్చని నిజాంపేట మండల వ్యవసాయాధికారి సతీష్ పేర్కొన్నారు. శనివారం ఆయన నిజాంపేట మండలంలో వరి పంటను పరిశీలించారు. ఈ సందర్భంగా ఆయన మాట్లాడుతూ.. వరి పంటలో మొగి పురుగు పొట్ట దశలో ఉన్నప్పుడే కార్టప్ హైడ్లో క్లోరైడ్ 400 గ్రామ్స్ లేదా కోరాజిన్ 60 ఎంఎల్ లీటర్ నీటికి ఒక ఎకరానికి పిచికారీ చేసుకోవాలని సూచించారు. అలాగే దోమపోటు నివారణకు డినోటీఫ్యూరన్ 80 గ్రామ్స్ లేదా పైమెట్రోజన్ 120 గ్రామ్స్ లేదా పెక్సన్ 98 ఎంఎల్ పిచికారీ చేయాలని సూచించారు. కంకి నల్లి నివారణకు ప్రొఫానోఫస్ 2 ఎంఎల్.. లీటర్ నీటికి కలిపి మందులను పిచికారీ చేసుకోవాలని పేర్కొన్నారు. యాసంగిలో శనగలు వేసుకునే రైతులకు శనగ విత్తనాలు నిజాంపేట ఆగ్రోస్ కేంద్రంలో అందుబాటులో ఉన్నాయన్నారు. 25 కేజీల శనగ బ్యాగులు 80 బస్తాలు అందుబాటులో ఉన్నాయని చెప్పారు.
