సారథిన్యూస్, నిజాంపేట: వ్యవసాయరంగంలో విప్లవాత్మక మార్పులు తీసుకొచ్చేందుకు తెలంగాణ ప్రభుత్వం నియంత్రిత సాగు విధానాన్ని అమల్లోకి తీసుకొచ్చిన విషయం తెలిసిందే. ఈ నేపథ్యంలో రాష్ట్రవ్యాప్తంగా వ్యవసాయాధికారులు రైతులు ఏయే పంటలు సాగుచేశారో పరిశీలిస్తున్నారు. ఈ మేరకు క్షేత్రస్థాయిలో పర్యటించి పంటవివరాలు నమోదు చేసుకుంటున్నారు. మెదక్ జిల్లాలోనూ ఈ కార్యక్రమం చురుగ్గా సాగుతున్నది. జిల్లాలో ఇప్పటికే 95 శాతం పంటనమోదు ప్రక్రియ పూర్తయినట్టు అధికారులు పేర్కొన్నారు. రైతులు తమ పంటలను మార్కెట్ చేసుకొనేందుకు ఇబ్బందులు పడకుండా ముందుగానే పంటవివరాలు నమోదు చేసుకుంటున్నామని అధికారులు చెబుతున్నారు. గతంలో రైతులకు గణనీయమైన దిగుబడి వచ్చినప్పటికీ .. మార్కెట్లో సరైన ధర ఉండేది కాదు. ఈ నేపథ్యంలో నియంత్రిత సాగువల్ల రైతులకు గిట్టుబాటు ధర వచ్చే అవకాశం ఉన్నది.
ప్రతి క్లస్టర్కు ఓ ఏఈవో
రైతుల పంట వివరాలను నమోదు చేసేందుకు ప్రతి క్లస్టర్కు ఓ ఏఈవోను నియమించారు. వీరు క్షేత్రస్థాయిలో పర్యటించి పంట వివరాలను నమోదు చేయనున్నారు. సేకరించిన వివరాలను ఎప్పటికప్పడు ఆన్లైన్లో నమోదు చేస్తున్నారు. పంట నమోదు కార్యక్రమాన్ని మండలాల్లో ఏవోలు, డివిజన్ స్థాయిలో ఏడీఏలు, జిల్లా స్థాయిలో డీఏవోలు పర్యవేక్షిస్తున్నారు.
మెదక్ జిల్లాలో 95 శాతం పూర్తి
మెదక్ జిల్లాలో 2 లక్షల 20 వేల మంది రైతులు ఉన్నారు. ఈ వానకాలం లక్ష 90 వేల ఎకరాల్లో పంటలను సాగుచేస్తున్నారు. వీటిలో ఇప్పటికే లక్ష 40 వేల ఎకరాల్లో పంటల వివరాలను అధికారులు సేకరించారు. పట్టణాల్లో నివాసం ఉంటూ.. గ్రామీణ ప్రాంతాల్లో వ్యవసాయం చేస్తున్న రైతులు ఏఈవోలకు ఫోన్ చేసి తమ వివరాలను చెప్పాలని అధికారులు సూచిస్తున్నారు.
విజయవంతంగా కొనసాగుతుంది
మెదక్ జిల్లాలో పంట నమోదు ప్రక్రియ విజయవంతంగా కొనసాగుతున్నదని జిల్లా వ్యవసాయాధికారి పరుశురాం నాయక్ పేర్కొన్నారు. ప్రతి సర్వే నంబర్లోని ప్రతి గుంటను వ్యవసాయశాఖ అధికారులు క్షుణ్ణంగా పరిశీలించి పక్కాగా వివరాలు నమోదు చేస్తున్నారని చెప్పారు. రైతులు వ్యవసాయాధికారులకు సహకరించాలని విజ్ఞప్తి చేశారు.
