- బైక్ ను అతివేగంతో ఢీకొట్టిన కారు
- అడ్డొచ్చినవారిపైకి దూసుకెళ్లిన డ్రైవర్
- ఒకరి దుర్మరణం, ఇద్దరి పరిస్థితి విషమం
- చెట్లమాటున కారును వదిలేసి పరారీ
సారథి, వెల్దండ: కారు డ్రైవర్ అతివేగం, నిర్లక్ష్యం ఓ నిండు ప్రాణాన్ని బలితీసుకుంది.. మరో ఇద్దరిని చావు అంచులదాకా తీసుకెళ్లింది.. హైవేపై జెట్స్పీడ్తో వస్తున్న కారు మొదట బైక్ను ఢీకొట్టడంతో దానిపై ఉన్న ఇద్దరు గాల్లోకి ఎగిరిపడ్డారు.. ఓ వ్యక్తి కారును ఆపేందుకు ప్రయత్నించగా అతని కూడా ఢీకొట్టడంతో ఎగిరి అవతలపడ్డాడు.. ఎక్కడ దొరికిపోతానోనని వాయువేగంతో తీసుకెళ్లి ఊరు చివరన పొలాల్లో చెట్లమాటున డ్రైవర్ కారును వదిలేసి పరారయ్యాడు.. సినిమా సీన్ను తలపించిన ఈ రియల్ క్రైమ్ బుధవారం నాగర్కర్నూల్ జిల్లా శ్రీశైలం– హైదరాబాద్ ప్రధాన రహదారి వెల్దండ చౌరస్తాలో చోటుచేసుకుంది. బాధితులు, స్థానికులు, పోలీసుల కథనం.. వెల్దండ మండలం పెద్దపూర్ పంచాయతీ పరిధిలోని గొల్లొనిపల్లికి చెందిన కొందరు వడ్డెర కులస్తులు గ్రామశివారులో బండను కొట్టుకోనివ్వడం లేదని, అనుమతి ఇచ్చి ఉపాధి చూపాలని తమ సమస్యలను చెప్పుకునేందుకు స్థానిక తహసీల్దార్ ఆఫీసుకు వచ్చారు. తహసీల్దార్కు వినతిపత్రం ఇచ్చిన అనంతరం పేపర్ తీసుకొచ్చేందుకు బైక్పై వెంకటేశ్(38), సత్తయ్య బయటకు వెళ్లారు. రోడ్డు దాటుతుండగా, ఇంతలో హైదరాబాద్ నుంచి కల్వకుర్తి వైపునకు అతివేగంగా దూసుకొస్తున్న కారు(టీఎస్08 యూబీ9525) వారిని ఢీకొట్టింది. దీంతో ఇద్దరూ సుమారు పది మీటర్ల ఎత్తున గాల్లోకి ఎగిరిపడ్డారు. ఇది గమనించి కారును ఆపేందుకు వెళ్లిన రామచంద్రయ్య అనే వ్యక్తిని డ్రైవర్ ఢీకొట్టి అత్యంత చాకచక్యంతో కారును ఆపినట్టే ఆపి తిరిగి తిప్పుకొని పరారయ్యాడు. సినిమాను తలపించేలా రెప్పపాటులో జరిగిన ఈ ఘటనను చూసి స్థానికులంతా హతాశులయ్యారు.
కారు విడిచి డ్రైవర్ పరారీ
పోలీసులు, స్థానికులు వెంబడించడంతో డ్రైవర్ తప్పించుకుని కొట్ర గేట్ నుంచి ఊరులోకి కారును మలిపాడు. గ్రామనడిబొడ్డున మరో ఇద్దరిని ఢీకొట్టే సమయంలో గ్రామస్తులు తప్పించుకున్నారు. కారును రెట్టించిన స్పీడ్తో వెళ్తుండగా కొట్ర గ్రామస్తులు బిత్తరపోయారు. చివరికి కారును బుడ్డొనిపల్లికి తీసుకెళ్లి అక్కడే వ్యవసాయ పొలాల్లో చెట్లమాటున వదిలివెళ్లి పరారయ్యాడు. ప్రమాదం జరిగిన సమయంలో కారులో ఇద్దరు మహిళలు, ఓ చిన్నారి ఉన్నట్లు స్థానికులు, గ్రామస్తులు చెబుతున్నారు. కారును వదిలేసి అందులో ఉన్నవారు కూడా కాలినడకన జారుకున్నారు. కాగా, గాయపడిన వారికి చికిత్స కోసం హైదరాబాద్ కు తరలిస్తుండగా, వెంకటేశ్ మార్గమధ్యంలోనే చనిపోయాడు. సత్తయ్య, రామచంద్రయ్య చావు బతుకుల మధ్య ఆస్పత్రిలో ట్రీట్మెంట్ తీసుకుంటున్నారు. సంఘటన స్థలాన్ని వెల్దండ సీఐ రామకృష్ణ, ఎస్సై నర్సింహులు పరిశీలించారు. స్థానికుల నుంచి వివరాలను ఆరాతీశారు. బుడ్డొనిపల్లి వద్ద విడిచివెళ్లిన కారును పోలీస్స్టేషన్కు తరలించారు. ఈ ప్రమాదంలో కారు ముందుభాగం పూర్తిగా నుజ్జునుజ్జయింది. కారుడ్రైవర్ పై కేసు నమోదుచేసి దర్యాప్తు చేస్తున్నట్లు పోలీసులు తెలిపారు.
