- స్థానిక సంస్థల ఎమ్మెల్సీ ఎన్నికల్లో మరో ట్విస్ట్
- మహబూబ్నగర్ నుంచి సిట్టింగ్ ఎమ్మెల్సీ కూచకుళ్లకు టికెట్ ఖరారు
- ఓకే చేసిన టీఆర్ఎస్ అధిష్టానం.. రేపు నామినేషన్ వేసే అవకాశం
సామాజిక సారథి, నాగర్ కర్నూల్ ప్రతినిధి: సీనియర్ నేత, సిట్టింగ్ ఎమ్మెల్సీ దామోదర్రెడ్డి వైపే టీఆర్ఎస్ అధిష్టానం మొగ్గుచూపింది. ఆయన అభ్యర్థిత్వాన్ని అడ్డుకోవాలని సొంత పార్టీలోనే కొందరు ప్రయత్నించినా తిరిగి కూచకుళ్లకే మహబూబ్నగర్ జిల్లా స్థానిక సంస్థల నుంచి ఎమ్మెల్సీ టికెట్ ఖరారు చేసింది. ఈ మేరకు సోమవారం సాయంత్రం బీ ఫామ్ ఇవ్వనున్నట్లు తెలిసింది. దీంతో ఇద్దరు సిట్టింగ్ ఎమ్మెల్సీలకు మళ్లీ అవకాశం దక్కినట్లయింది. ఆదివారం రాత్రి ప్రకటించిన జాబితాలో కసిరెడ్డి నారాయణరెడ్డి, ప్రముఖ గాయకుడు సాయిచంద్ పేర్లు ఉన్నాయి. దీంతో సిట్టింగ్ ఎమ్మెల్సీ దామోదర్ రెడ్డి అనుచరవర్గం తీవ్ర ఆందోళనకు గురైంది. ఆయనకు నియోజకవర్గంలో 30వేలకు పైగా ఓటు బ్యాంకు ఉంది. గత అసెంబ్లీ ఎన్నికల్లో నాగర్కర్నూల్ ఎమ్మెల్సీ మర్రి జనార్ధన్రెడ్డి భారీ మెజార్టీ విజయాన్ని అందుకోవడంలో కీలకపాత్ర పోషించారు. తనకు టికెట్ ఇవ్వకపోతే తన దారి తాను చూసుకుంటానని కూచకుళ్ల అధిష్టానం ముందు తేల్చిచెప్పినట్లు తెలిసింది. ఈ నేపథ్యంలో టీఆర్ఎస్ అధిష్టానం తన నిర్ణయాన్ని అనూహ్యంగా మార్చుకున్నట్లు ప్రచారం జరిగింది. దీంతో రంగంలోకి దిగిన మంత్రి టి.హరీశ్రావు కూచకుళ్ల దామోదర్రెడ్డితో చర్చలు జరిపించినట్లు విశ్వసనీయ సమాచారం. నాగర్కర్నూల్ నియోజకవర్గంలో టీఆర్ఎస్ పార్టీకి గట్టి ఎదురుదెబ్బ తగిలే అవకాశం ఉందని భావించిన అధినాయకత్వం మళ్లీ ఆయనకే ఎమ్మెల్సీ టికెట్ ఇవ్వాలని నిర్ణయించింది. దీంతో కూచకుళ్ల దామోదర్రెడ్డి మంగళవారం నామినేషన్ వేసే అవకాశాలు ఉన్నాయి.
‘హామీ ఇచ్చాకే’ టీఆర్ఎస్లోకి..
ఉమ్మడి మహబూబ్నగర్ జిల్లా నుంచి టీఆర్ఎస్ పార్టీ నుంచి గత ఎన్నికలో సిట్టింగ్ ఎమ్మెల్సీ కసిరెడ్డి నారాయణరెడ్డి గెలుపొందారు. మరో స్థానం నుంచి కాంగ్రెస్ అభ్యర్థిగా పోటీచేసిన కూచుకుళ్ల దామోదర్ రెడ్డి విజయం సాధించారు. అనంతరం జరిగిన రాజకీయ పరిణామాల నేపథ్యంలో ఆయన కాంగ్రెస్ను వీడి టీఆర్ఎస్ గూటికి చేరారు. జాయిన్ చేసుకునే క్రమంలో మళ్లీ ఎమ్మెల్సీ టిక్కెట్ తనకే ఇస్తామని అప్పట్లో సీఎం కేసీఆర్, మంత్రి హరీశ్రావు ఇద్దరు హామీ ఇచ్చారు. ఆ హామీ మేరకే మరోసారి కూచకుళ్ల దామోదర్రెడ్డికి టికెట్ ఖరారు చేసినట్లు తెలిసింది.
