సారథి న్యూస్, హైదరాబాద్: ప్రధానమంత్రి నరేంద్రమోడీ శనివారం మధ్యాహ్నం హైదరాబాద్‌లోని భారత్ బయోటెక్ సంస్థను సందర్శించారు. వ్యాక్సిన్ తయారీలో సాధించిన పురోగతిని శాస్త్రవేత్తలు ప్రధాని మోడీకి వివరించగా.. వారి కృషిని ఆయన అభినందించారు. ఇప్పటివరకు సాధించిన ప్రగతిని తెలుసుకుని సంతృప్తి వ్యక్తం చేశారు. కోవిడ్-19ను అరికట్టేందుకు స్వదేశీ వ్యాక్సిన్ తయారీలో సాధించిన పురోగతిని సైంటిస్టులు తనకు వివరించారని ప్రధాని మోడీ ట్వీట్చేశారు. అంతకుముందు మోడీ గుజరాత్‌లోని అహ్మదాబాద్‌లోని జైడస్ బయోటెక్ పార్క్‌లో కోవిడ్-19 వ్యాక్సిన్ తయారీపై సమీక్షించారు. వ్యాక్సిన్ తయారీకి కృషి చేస్తున్న శాస్త్రవేత్తలను అభినందించారు. ప్రధాని మోడీ అంతకు ముందు హకీంపేట విమానాశ్రయానికి ప్రత్యేక విమానంలో చేరుకున్నారు. అనంతరం హైదరాబాద్ నుంచి ప్రధాని మోడీ ప్రత్యేక విమానంలో పుణేలోని సీరం ఇన్‌స్టిట్యూట్‌లో వ్యాక్సిన్ తయారీ పురోగతిని సమీక్షించనున్నారు.
