సారథి న్యూస్, మెదక్: రైతును రాజుగా చేయడమే లక్ష్యంగా రాష్ట్ర ప్రభుత్వం నూతన రెవెన్యూ చట్టాన్ని తీసుకొచ్చిందని మంత్రి హరీశ్ రావు స్పష్టంచేశారు. ఈ చట్టం ప్రకారం తహసీల్దార్ ఆఫీసుల్లోనే అన్ని పనులు పూర్తవుతాయని స్పష్టం చేశారు. అలాగే భూమిని కొన్నా, అమ్మినా తహసీల్దార్ల సమక్షంలోనే చేస్తారని, వాటికి సంబంధించిన పట్టాదారు పాస్పుస్తకాలు, రిజిస్ట్రేషన్ పేపర్లు పోస్టులోనే రైతుల ఇంటికి వస్తాయని తెలిపారు. దీనికోసం రైతులు గతంలో మాదిరిగా ఆఫీసుల చుట్టూ తిరిగాల్సిన పనిలేదన్నారు. బుధవారం మెదక్ జిల్లా చేగుంట, నార్సింగి మండలాలకు చెందిన 400 మంది రైతులకు డిజిటల్ సంతకంతో కూడిన పట్టాదారు పాస్బుక్కులను చేగుంటలోని సాయిబాలాజీ ఫంక్షన్హాల్లో ఏర్పాటుచేసిన కార్యక్రమంలో పంపిణీ చేశారు.
ఈ సందర్భంగా మంత్రి హరీశ్రావు మాట్లాడుతూ.. ఆరేళ్ల కాలంలో రైతుల కోసం పాటుపడిన ప్రభుత్వం తమదేనని స్పష్టంచేశారు. ప్రస్తుతం నూతన రెవెన్యూ చట్టాన్ని అసెంబ్లీలో ప్రవేశపెట్టి సాహసోపేత నిర్ణయం తీసుకున్న ఘనత సీఎం కేసీఆర్కే దక్కుతుందన్నారు. మెదక్ఎంపీ కొత్త ప్రభాకర్రెడ్డి మాట్లాడుతూ కొత్త రెవెన్యూచట్టం తీసుకొచ్చి తెలంగాణ రాష్ట్ర రైతులకు సీఎం కేసీఆర్ఎంతో మేలు చేశారని అన్నారు. కార్యక్రమంలో నర్సాపూర్, నారాయణఖేడ్ ఎమ్మెల్యేలు మదన్రెడ్డి, భూపాల్రెడ్డి, మెదక్ జిల్లా అడిషనల్ కలెక్టర్ వెంకటేశ్వర్లు, తూప్రాన్ ఆర్డీవో శ్యాంప్రకాశ్, చేగుంట, నార్సింగి మండలాల జడ్పీటీసీలు, ఎంపీపీలు, ఎంపీటీసీలు, సర్పంచ్లు, ప్రజాప్రతినిధులు, అధికారులు పాల్గొన్నారు.
