సారథి న్యూస్, హైదరాబాద్: గిరిజనుల హక్కుల రక్షణకు రాష్ట్ర ప్రభుత్వం కట్టుబడి ఉందని గిరిజన, మహిళా శిశు సంక్షేమశాఖ మంత్రి సత్యవతి రాథోడ్ స్పష్టంచేశారు. జీవోనం.3ను కొనసాగించేలా సుప్రీంకోర్టులో రివ్యూ పిటిషన్ వేసేందుకు సీఎం కేసీఆర్ అంగీకరించారని తెలిపారు. గురువారం మాసాబ్ట్యాంక్లోని దామోదర సంజీవయ్య సంక్షేమ భవన్ లో అధికారులతో నిర్వహించిన సమావేశంలో మాట్లాడారు. ఏజెన్సీ ప్రాంతాల్లోని టీచర్ ఉద్యోగాలను వందశాతం గిరిజనులతోనే భర్తీ చేసేందుకు 2000లో ఇచ్చిన జీవోనం.3ను సుప్రీంకోర్టు రాజ్యాంగ ధర్మాసనం కొట్టివేయడం దురదృష్టకరమన్నారు. ఈ విషయమై ఇప్పటికే రెండుసార్లు కేంద్ర గిరిజన సంక్షేమశాఖ మంత్రి అర్జున్ ముండాతో మాట్లాడినట్లు మంత్రి తెలిపారు. సమీక్షలో గిరిజన సంక్షేమశాఖ కార్యదర్శి క్రిస్టినా జడ్ చొంగ్తు, అదనపు సంచాలకులు సర్వేశ్వర్ రెడ్డి పాల్గొన్నారు.
