సారథి న్యూస్, మెదక్: తమ ఇళ్ల సమీపంలో కోవిడ్–19 నిర్ధారణ సెంటర్ ఏర్పాటు చేయొద్దని మెదక్ పట్టణంలోని జంబికుంట వీధి ప్రజలు ఆందోళన చేపట్టారు. స్థానిక జిల్లా ప్రభుత్వ ఆస్పత్రిలో కరోనా నిర్ధారణ ల్యాబ్ ఏర్పాటుపై శుక్రవారం పెద్దఎత్తున నిరసనలు వ్యక్తమయ్యాయి. స్థానిక ఎమ్మెల్యే పద్మాదేవేందర్ రెడ్డి చేతులమీదుగా ల్యాబ్ ప్రారంభోత్సవానికి అధికారులు ఏర్పాట్లు చేయగా ఆ కార్యక్రమాన్ని అడ్డుకోవాలని కాంగ్రెస్ నాయకులు నిర్ణయించారు. కాగా పోలీసులు కాంగ్రెస్ అధికార ప్రతినిధి, 5వ వార్డు కౌన్సిలర్ మామిళ్ల ఆంజనేయులును హౌస్ అరెస్ట్చేశారు. ఆ తర్వాత ప్రభుత్వ ఆసుపత్రి వద్దకు వచ్చిన కాంగ్రెస్ నాయకులు మధుసూదన్రావు, గూడూరి ఆంజనేయులు గౌడ్, కృష్ణ, దుర్గాప్రసాద్ తదితరులను అరెస్ట్ చేసి టౌన్ పోలీస్ స్టేషన్ కు తరలించారు.
ఎమ్మెల్యే పద్మాదేవేందర్ రెడ్డి వెహికిల్ ఆస్పత్రి వద్దకు రాగానే ఒక్కసారిగా మహిళలు, పురుషులు అడ్డుకున్నారు. దీంతో పోలీసులు జోక్యం చేసుకుని ఆందోళనకారులను పక్కకు తప్పించి ఎమ్మెల్యేకు వినతిపత్రం ఇచ్చేందుకు కొందరిని అనుమతించారు. కరోనా ల్యాబ్ విషయంలో ఎలాంటి ఆందోళన చెందాల్సిన అవసరం లేదని ఎమ్మెల్యే పద్మాదేవేందర్రెడ్డితోపాటు కలెక్టర్ ఎం.ధర్మారెడ్డి వారికి నచ్చజెప్పారు. అనంతరం ప్రారంభించారు.
