- ఆంధ్రప్రదేశ్ ప్రభుత్వ నిర్ణయం
- ఏర్పాట్లు చేయాలని సీఎం జగన్ ఆదేశాలు
సారథి న్యూస్, అనంతపురం: ఆంధ్రప్రదేశ్ ప్రభుత్వం ఆ రాష్ట్ర విద్యార్థులకు శుభవార్త అందించింది. ప్రాణాంతక కరోనా వైరస్‌ కారణంగా మూతపడ్డ స్కూళ్లను తిరిగి ప్రారంభించేందుకు సిద్ధమైంది. ఆగస్టు 3న రాష్ట్రంలోని అన్ని స్కూళ్లను పునఃప్రారంభించాలని సీఎం వైఎస్‌ జగన్‌మోహన్‌రెడ్డి అధికారులను ఆదేశించారు. ఈ మేరకు మంగళవారం ‘నాడు..నేడు’ కార్యక్రమంపై సమీక్షంలో భాగంగా స్కూళ్ల అభివృద్ధిపై సీఎం ఆరాతీశారు. జులై నెలారులోగా మొదటి విడతలో చేపట్టిన 15,715 స్కూళ్లలో ‘నాడు..నేడు’ కింద చేపట్టిన అభివృద్ధి పనులను పూర్తిచేయాలని సీఎం జగన్ ఆదేశించారు. ప్రతి స్కూలులో 9 రకాల సదుపాయాలు కల్పించాలని సూచించారు. దీనికి సంబంధించి రూ.456 కోట్ల రివాల్వింగ్‌ ఫండ్‌ కూడా రిలీజ్ చేశామన్నారు. పనులను కంప్లీట్ చేసేలా ఆయా జిల్లాల కలెక్టర్లు ప్రతిరోజు సమీక్ష చేయాలని సూచించారు. మరోవైపు స్కూళ్ల అభివృద్ధి పనులకు సిమెంట్, ఇసుక సరఫరాకు ఇబ్బందులు లేకుండా చూడాలని అధికారులను ఆదేశించారు.
