మూడంతస్థుల ఆపార్ట్మెంట్ కుప్పకూలి అందులో ఉన్న 8 మంది మృతిచెందగా.. పదుల సంఖ్యలో క్షతగాత్రులయ్యారు. ఈ దారుణ ఘటన మహారాష్ట్రలోని భివాండిలో అదివారం అర్ధరాత్రి చోటుచేసుకుంది. పోలీసులు తెలిపిన వివరాల ప్రకారం.. భివాండిలో 1984లో ఓ భవనాన్ని నిర్మించారు. ఇక్కడ దాదాపు 21 కుటుంబాలు నివసిస్తున్నాయి. అయితే ఈ భవనం శిథిలావస్థకు చేరుకుందని, వెంటనే అక్కడ నివాసం ఉన్నవారంతా భవంతిని ఖాళీచేయాలని మున్సిపల్ సిబ్బంది ఇప్పటికే నోటీసులు కూడా జారీచేశారు. అయినప్పటికే ఈ భవంతిని ఎవరూ ఖాళీ చేయలేదు. ఇటీవల కురిసిన భారీవర్షాలకు భవనం మరింత కుంగిపోయింది. ఆదివారం అర్ధరాత్రి కుప్పకూలింది. ప్రమాదం విషయం తెలుసుకున్న ఎన్‌డీఆర్‌ఎఫ్‌ బృందం తక్షణ సహాయక చర్యలు చేపట్టింది. 8నుంచి 10 మందిని శిథిలాల నుంచి బయటకు తీశారు. ఈ ఘటన జరిగిన సమయంలో ఇండ్లలోని వారంతా నిద్రలో ఉండటంతో వారంతా చనిపోయినట్టు అధికారులు వెల్లడించారు.
