సామాజిక సారథి, ఏటూరు నాగారం: పీఎల్జీఏ 21వ వార్షిక వారోత్సవాలు డిసెంబర్ 2నుంచి డిసెంబర్10 వరకు జరుపుకోవాలని మావోయిస్టులు పిలుపునివ్వడంతో పోలీసులు మరింత అలర్ట్ అయ్యారు. ఏజెన్సీ సరిహద్దు ప్రాంతంలో భద్రత కట్టుదిట్టం చేశారు. ప్రత్యేక పోలీసు బలగాలతో అడవులను జల్లడ పడుతున్నారు. రహదారులు, గోదావరి పరీవాహక ప్రాంతాలపై డేగ కన్నుతో సోదాలు నిర్వహిస్తూ అనుమానిత వ్యక్తుల వివరాలు సేకరిస్తున్నారు. ఈ క్రమంలో పోలీసుల కళ్లుగప్పి మావోయిస్టులు వారి ఉనికిని చాటుకున్న ఘటన ములుగు జిల్లా ఏటూరునాగారం మండలంలోని రొయ్యుర్ లో శనివారం జరిగింది. రొయ్యుర్ నుంచి బీటీరోడ్డు నిర్మాణ పనులు వేగవంతంగా జరుగుతున్నాయి. ఈ తరుణంలో రోడ్డు నిర్మాణం చేస్తున్న రోడ్డు రోలర్ యంత్రం వాహనానికి నిప్పుపెట్టి కాల్చి సమీపంలో ఏటూరు నాగారం, మహదేవపూర్ ఏరియా కమిటీ పేరుతో మావోయిస్టులు కరపత్రాన్ని వదిలివెళ్లారు.
