ఏపీ అక్రమ ప్రాజెక్టులతో పాలమూరు, రంగారెడ్డి ఎడారే

• లంకలో అంతా రాక్షసులే ఉంటారని నిరూపించిన ఏపీ సీఎం జగన్​
• నాగర్​కర్నూల్​ ఎమ్మెల్యే మర్రి జనార్ధన్​రెడ్డి ధ్వజం

సారథి ప్రతినిధి, నాగర్​కర్నూల్: లంకలో అంతా రాక్షసులే ఉంటారని ఏపీ సీఎం వైఎస్​జగన్​మోహన్​రెడ్డి నిరూపించారని నాగర్​కర్నూల్​ఎమ్మెల్యే మర్రి జనార్ధన్​రెడ్డి మండిపడ్డారు. తెలంగాణ పాలిట గాడ్సేగా మారాడని విమర్శించారు. ఏపీ నిర్మిస్తున్న అక్రమ ప్రాజెక్టులతో పాలమూరు, రంగారెడ్డి జిల్లాలు ఎడారిలా మారిపోతాయని ఆందోళన వ్యక్తం చేశారు. తెలంగాణ రైతాంగం ఉసురు తగిలితే జగన్ ఇంటికి పోవడం ఖాయమన్నారు. శనివారం ఆయన నాగర్​కర్నూల్​లో మీడియా సమావేశంలో మాట్లాడారు. సమైక్యపాలనలో 11వేల క్యూసెక్కులకు గానూ నాటి సీఎం వైఎస్సార్​ 44వేల క్యూసెక్కుల నీటిని అనధికారికంగా తీసుకెళ్లారని గుర్తుచేశారు. దీన్ని నిరసిస్తూ టీఆర్ఎస్​ఎమ్మెల్యేలు నాడే రాజీనామా చేశారని వివరించారు. రోజుకు నాలుగు టీఎంసీల నీటిని దోపిడీ చేశారని, నాడు డీకే అరుణ, పొన్నాల లక్ష్మయ్య స్వాగతం పలికారని విమర్శించారు. ఇప్పుడు వారికి మాట్లాడే నైతికహక్కు ఉందా? అని ప్రశ్నించారు. కొందరు సీఎం కేసీఆర్​ను తిడితే గొప్పవాళ్లు అవుతారని అనుకుంటున్నారని, అది కుదరదన్నారు. 70 టీఎంసీల నీటిని వాడుకునేలా చేపట్టిన జూరాల, నెట్టెంపాడు, కోయిల్​సాగర్, కల్వకుర్తి ఎత్తిపోతల పథకం నుంచి 20 టీఎంసీల నీటిని మాత్రమే వాడుకోవాల్సి వస్తోందని వివరించారు. టీఆర్ఎస్​ప్రభుత్వ హయాంలో ఆరేళ్లలో 10 లక్షల ఎకరాలకు సాగునీరు అందించామని తెలిపారు. బండి సంజయ్ మాట్లాడేది అర్థరహితమన్నారు. ప్రధాని వద్దకు బీజేపీ అఖిలపక్షాన్ని తీసుకెళ్లాలని కోరారు.