- 10.8 లక్షల నల్లా కలెక్షన్లకు బెనిఫిట్
- 20వేల లీటర్లు దాటితే బిల్లు కట్టాల్సిందే
- మార్చి 31లోపు మీటర్ బిగించుకోవాల్సిందే
- ఉచిత తాగునీటి పథకాన్ని ప్రారంభించిన మంత్రి కేటీఆర్
సారథి న్యూస్, హైదరాబాద్: హైదరాబాద్ మహానగరంలో ఇక నుంచి ఫ్రీగా డ్రింకింగ్ వాటర్ అందనుంది. గ్రేటర్ హైదరాబాద్ ఎన్నికల హామీలో భాగంగా ఈ మేరకు మున్సిపల్శాఖ మంత్రి కె.తారక రామారావు మంగళవారం నగర వాసులకు ‘ఉచిత తాగునీటి’ పథకాన్ని రెహ్మత్నగర్లో ప్రారంభించారు. ఈ సందర్భంగా ఆయన మాట్లాడుతూ.. గ్రేటర్ హైదరాబాద్ లో 10.8 లక్షల నల్లా కలెక్షన్లకు ఫ్రీగా తాగునీరు అందిస్తున్నామని చెప్పారు. ఈ పథకంలో గ్రేటర్ పరిధిలో 97శాతం మందికి లబ్ధి కలుగుతుందన్నారు. ఉచితంగా తాగునీరు కావాలంటే మార్చి 31లోపు తప్పనిసరిగా మీటర్లు ఏర్పాటు చేసుకోవాల్సిందేనని సూచించారు. మురికివాడల్లో ఉండే ప్రజలకు మీటర్ తీసుకోవాల్సిన అవసరం లేదన్నారు. 20వేల లీటర్లు దాటితే బిల్లు కట్టాల్సి ఉంటుందన్నారు. 10.8 లక్షల నల్లా కలెక్షన్లకు ఉచితంగా నీటి సరఫరా ద్వారా జలమండలి నెలకు రూ.19.92 కోట్ల ఆదాయాన్ని కోల్పోనుందని వివరించారు. కార్యక్రమంలో మంత్రులు డిప్యూటీ సీఎం మహమూద్ అలీ, మంత్రులు తలసాని శ్రీనివాస్ యాదవ్, చామకూర మల్లారెడ్డి, గ్రేటర్ హైదరాబాద్ మేయర్ బొంతు రాంమోహన్, డిప్యూటీ మేయర్ బాబాఫసియోద్దిన్, ఎమ్మెల్యేలు మాగంటి గోపీనాథ్, దానం నాగేందర్, ముఠా గోపాల్, వివేకానంద, ఎమ్మెల్సీ మల్లేశం, రాష్ట్ర ప్రభుత్వ ప్రధాన కార్యదర్శి సోమేశ్కుమార్, మున్సిపల్ శాఖ ముఖ్య కార్యదర్శి అరవింద్ కుమార్, జీహెచ్ఎంసీ కమిషనర్ లోకేష్ కుమార్, టీఆర్ఎస్ కార్పొరేటర్లు పాల్గొన్నారు.
