మాస్కో: రష్యా ప్రతిష్ఠాత్మకంగా తీసుకొచ్చిన కరోనా వ్యాక్సిన్ ‘స్పుత్నిక్ – వీ’ ఎంతో అద్భుతంగా పనిచేస్తున్నదని.. ప్రముఖ మెడికల్ జర్నల్ లాన్పెట్ వెల్లడించింది. దీంతో ప్రపంచవ్యాప్తంగా రష్యా వ్యాక్సిన్పై వెల్లువెత్తున్న ఆరోపణలకు చెక్పడింది. శుక్రవారం విడుదలైన లన్సెట్ జర్నల్లో రష్యా వ్యాక్సిన్పై విశ్లేషణాత్మక కథనాన్ని ప్రచురించారు. ఈ ఏడాది జూన్-జూలైలో రెండు దశల్లో మొత్తం 76 మందికి ఈ వ్యాక్సిన్ ఇచ్చారని జర్నల్లో పేర్కొన్నారు. వారిలో ఎవరికీ ఏవిధమైన ఆరోగ్య సమస్య రాలేదని పేర్కొన్నారు. పైగా వ్యాక్సిన్ సమర్థంగా పనిచేస్తున్నదని.. శరీరంలో యాంటి బాడీస్ను ఉత్పత్తి చేసి కరోనాను అందమొందిస్తున్నదని ఈ కథనంలో పేర్కొన్నారు. రష్యా వ్యాక్సిన్ అత్యంత సురక్షితమైనదని .. ఈ వ్యాక్సిన్పట్ల ఎవరూ అనుమానాలు పెట్టుకొవద్దని కూడా పేర్కొన్నారు. ఈ కథనం ప్రస్తుతం అంతర్జాతీయ మీడియాలో సంచలనంగా మారింది. తమపై తరుచూ వస్తున్న ఆరోపణలకు ఇది సరైన కౌంటర్ అని రష్యాకు చెందిన పలువురు శాస్త్రవేత్తలు అభిప్రాయపడ్డారు. ప్రపంచంలో అందరి కంటే ముందుగా వ్యాక్సిన్ కనిపెట్టిన దేశంగా రష్యా రికార్డు నెలకొల్పింది. అయితే ఈ వ్యాక్సిన్పై పలు దేశాల శాస్త్రవేత్తలు అనుమానాలు వక్తం చేశారు. క్లినికల్ ట్రయల్స్కు సంబంధించిన వివరాలు గోప్యంగా ఉంచడం పట్ల సైంటిస్టులు అభ్యంతరాలు వ్యక్తం చేశారు. లన్సెట్ ప్రచురణ తమకు కొండంత ధైర్యాన్ని అందించిందని రష్యన్ డైరెక్టర్ ఇన్వెస్ట్మెంట్ ఫండ్ అధినేత కిరిల్ దిమిత్రియేవ్ పేర్కొన్నారు.
