న్యూఢిల్లీ: కరోనా లాక్ డౌన్తో ఇళ్లకే పరిమితమైన ఆటగాళ్లు కొత్త వ్యాపకాలతో బిజీగా ఉంటున్నారు. ఎక్కువ మంది సామాజిక మధ్యమాల్లో గడుపుతుంటే.. మరికొందరు వ్యవసాయంలో సేద తీరుతున్నారు. భారత ఫుట్బాల్ జట్టు మాజీ కెప్టెన్ గౌరీమాంగ్ సింగ్ కూడా తన పొలంలో సేంద్రియ సేద్యం చేస్తూ ఉత్సాహం పొందుతున్నాడు. ఇంఫాల్లో సోదరులతో కలిసి కూరగాయలు పండిస్తున్నాడు. ‘మా ఇంటి పక్కనే కొంత పొలం ఉంది. రెండేళ్ల నుంచి అక్కడ కూరగాయలు పండిస్తున్నాం. అయితే లాక్డౌన్తో నేను కూడా ఇంటి పట్టునే ఉండాల్సి వచ్చింది. దీంతో అల్లం, పసుపు, మిరప సాగు చేశాం. దోసకాయ, మొక్కజొన్న, గుమ్మడి, కాకరకాయలాంటి విభిన్నమైనవి పండిస్తున్నాం. ఇవన్నీ సేంద్రియ పద్ధతుల్లో సాగు చేస్తున్నాం. నాకూ గార్డెన్లో గడపడం చాలా ఇష్టం. అందుకే నేను కూడా ఇందులో పాలుపంచుకుంటున్నా.
ఓవైపు ఎక్సర్సైజ్, మరోవైపు మనసు ప్రశాంతంగా ఉంటుంది. రోజు కొన్ని గంటలు అక్కడే గడుపుతున్నా. కూరగాయలతో మాకు మంచి ఫలితం కూడా రావడం ఆనందగా ఉంది’అని గౌరీమాంగ్ పేర్కొన్నాడు. భవిష్యత్లో ఈ వ్యవసాయాన్ని మరింత విస్తరించాలనుకుంటున్నట్లు చెప్పాడు. భారత్ తరఫున 71 మ్యాచ్లు ఆడిన గౌరీమాంగ్.. 2013లో చివరి అంతర్జాతీయ మ్యాచ్ ఆడాడు.
