న్యూఢిల్లీ: సన్రైజర్స్ హైదరాబాద్ ప్లేయర్లు తనపై వర్ణవివక్ష వ్యాఖ్యలు చేశారని కొన్ని రోజులుగా ఆరోపణలు చేస్తున్న వెస్టిండీస్ మాజీ కెప్టెన్ డారెన్ స్యామీ వెనక్కి తగ్గాడు. తన సహచరులు ప్రేమతోనే ‘కాలూ’ అని పిలిచారని ఓ ట్వీట్తో తేల్చేశాడు. ఈ అంశాన్ని ఇంతటితో వదిలేస్తున్నట్లు ప్రకటించాడు. ‘నన్ను కాలూ అని పిలిచిన వ్యక్తితో మాట్లాడా. మా మధ్య ఆసక్తికరమైన సంభాషణ చోటు చేసుకుంది. మ్యాచ్ల బాగా ఆడినప్పుడు, ప్రేమ ఎక్కువైనప్పుడు అలా పిలుస్తారని చెప్పాడు. ఇందులో వర్ణవివక్ష లేదని స్పష్టత ఇచ్చాడు. ఇద్దరం కలిసి దీనిపై ఓ అవగాహనకు వచ్చాం. అతడు చెప్పిన మాటలను పూర్తిగా నమ్ముతున్నా. ఇంతటితో ఈ విషయాన్ని వదిలేస్తున్నా’ అని స్యామీ రాసుకొచ్చాడు.
