పాపుల‌ర్ యాంక‌ర్ ప్రదీప్ మాచిరాజు హీరోగా ప‌రిచ‌యం అవుతున్న ‘30రోజుల్లో ప్రేమించ‌డం ఎలా’ చిత్రంలోని ‘నీలి నీలి ఆకాశం ఇద్దామ‌నుకున్నా’ పాట యూ ట్యూబ్‌లో సెన్సేష‌న‌ల్‌ రికార్డులు సృష్టిస్తోంది. సంగీతప్రియుల ఆద‌ర‌ణ‌తో 150 మిలియ‌న్ వ్యూస్ క్రాస్ చేసి, చిన్న సినిమాల పాట‌ల్లో ఈ ఫీట్ సాధించిన సాంగ్‌గా స‌రికొత్త రికార్డును సృష్టించింది. సుకుమార్ వద్ద ‘ఆర్య 2’, ‘1.. నేనొక్కడినే’ చిత్రాల‌కు ప‌నిచేసిన మున్నా దర్శకత్వం వహించిన ఈ చిత్రాన్ని ఎస్వీ ప్రొడ‌క్షన్స్ బ్యాన‌ర్‌పై క‌న్నడ చిత్రసీమలో విజ‌య‌వంత‌మైన చిత్రాల నిర్మాత‌గా పేరుపొందిన ఎస్వీ బాబు నిర్మిస్తున్నారు.
అనూప్ రూబెన్స్ సంగీతం సమకూర్చగా, ‘నీలి నీలి ఆకాశం’ పాటతో స‌హా చిత్రంలోని అన్ని పాట‌ల‌నూ చంద్రబోస్ రాశారు. ప్రదీప్ మాచిరాజు, అమృతా అయ్యర్పై చిత్రీక‌రించిన ‘నీలి నీలి ఆకాశం’ పాట 150 మిలియ‌న్ వ్యూస్ దాట‌డంతో చిత్రబృంద‌మంతా ఆనందాన్ని వ్యక్తంచేస్తోంది. టాలీవుడ్‌లోనే కాకుండా సౌత్ ఇండియాలోనే ఇదొక అరుదైన ఫీట్‌గా విశ్లేష‌కులు అభివ‌ర్ణిస్తున్నారు. స్టార్లు లేని ఒక చిన్న సినిమాలోని పాటకు ఈ స్థాయి ఆద‌ర‌ణ ల‌భించ‌డం అపురూప‌మైన విష‌యంగా వారు చెబుతున్నారు. అనూప్ రూబెన్స్ ఇచ్చిన విన‌సొంపైన బాణీల‌కు చంద్రబోస్ రాసిన క‌మ‌నీయ సాహిత్యం, సింగ‌ర్స్‌ సిద్ శ్రీ‌రామ్‌, సునీత సుమ‌ధ‌ర గానం తోడై ఈ పాట‌ను ఇంత బ్లాక్‌బస్టర్ చేశాయ‌ని నిర్మాత ఎస్వీ బాబు అన్నారు. ఈ సంద‌ర్భంగా సంగీత ప్రియుల‌కు ఆయ‌న ధ‌న్యవాదాలు తెలిపారు.
ఒక సింగ‌ర్‌ను ఐదేళ్లు బతికించడానికి ఒకపాట చాల‌నీ ‘నీలి నీలి ఆకాశం అలాంటి పాట‌నీ’ గాయ‌ని సునీత అన్నారు. త‌న కెరీర్‌లో ఈ పాట ఓ మ‌ధుర‌మైన మ‌లుపుగా నిలించింద‌ని ఆమె అమితానందం వ్యక్తంచేశారు.ఈ పాట విజ‌యోత్సవంలో తాను భాగ‌స్వామినే కాకుండా భావ‌స్వామిని కూడా అయినందుకు గర్వపడుతున్నానని లిరిసిస్ట్ చంద్రబోస్ చెప్పారు. ఈ పాట‌ను అమ‌లాపురం నుంచి అమెరికా దాకా అంద‌రూ పాడుకుంటున్నార‌ని డైరెక్టర్ మున్నా సంతోషం వ్యక్తంచేశారు. తాను ఇప్పటివరకు కంపోజ్ చేసిన సాంగ్స్‌లో ఏ పాట‌నీ విన‌న‌న్ని సార్లు విన్నాన‌ని మ్యూజిక్ డైరెక్టర్ అనూప్ రూబెన్స్ అన్నారు.
‘30 రోజుల్లో ప్రేమించ‌డం ఎలా’ సినిమా ఔట్‌పుట్ చూసి నచ్చడంతో ప్రపంచవ్యాప్తంగా ఈ సినిమాను విడుదల చేయ‌డానికి నిర్మాత‌లతో జీఏ2, యూవీ క్రియేష‌న్స్ సంస్థలు ఒప్పందం కుదుర్చుకోవ‌డం విశేషం. ఇలా రెండు అగ్రడిస్ట్రిబ్యూష‌న్ సంస్థల స‌పోర్ట్ ల‌భించ‌డం సినిమాకు ప్లస్ అవుతోంది.
సినిమాకు సంబంధించిన అన్ని కార్యక్రమాలు పూర్తయ్యాయని, ప్రస్తుతం దేశంలో నెలకొన్న సంక్షోభ ప‌రిస్థితులు స‌మ‌సిపోయి, సాధార‌ణ పరిస్థితి నెలకొన్న తర్వాత చిత్రాన్ని విడుదల చేస్తామని నిర్మాత ఎస్వీ బాబు ప్రకటించారు.
