సారథి న్యూస్, నర్సాపూర్: మెదక్ జిల్లా నర్సాపూర్ పట్టణంలో ని చిల్డ్రన్ పార్కు లో కూరగాయల మార్కెట్ ఏర్పాటు చేయడంపై ఆయా గ్రామాల ప్రజాప్రతినిధులు మండిపడ్డారు. కబ్జాచేసేందుకు కుట్రపన్నుతున్నారని ఆక్షేపించారు. శుక్రవారం నర్సాపూర్ ఎంపీడీవో ఆఫీసులో ఎంపీపీ జ్యోతిసురేష్ నాయక్ అధ్యక్షతన జనరల్ బాడీ మీటింగ్ నిర్వహించారు. టీపీసీసీ అధికార ప్రతినిధి రెడ్డిపల్లి ఆంజనేయులు గౌడ్ మాట్లాడుతూ.. నర్సాపూర్ చెరువులో పెద్దఎత్తున ఇసుకను తవ్వుతున్నా అధికారులు చూసీచూడనట్లు వ్యవహరిస్తున్నారని అన్నారు. పేదలు ఇంటి బాత్రూమ్ను కట్టుకోవడానికి ట్రాక్టర్ ఇసుకను తీసుకొస్తే పెనాల్టీని వేసి ఇబ్బందులకు గురిచేస్తున్నారని ఆవేదన వ్యక్తంచేశారు.
పాత తహసీల్దార్ భవనంలో ప్రస్తుతం కూరగాయలు, చేపల మార్కెట్ నడిపించడం సరైంది కాదన్నారు. కొందరు చిల్డ్రన్స్ పార్కును కబ్జా చేసేందుకే కూరగాయల మార్కెట్ ను మార్చారని ఆక్షేపించారు. పాత తహసీల్దార్ ఆఫీసు స్థలంలోనే నూతన భవనాన్ని కట్టాలని సభ్యులు డిమాండ్ చేశారు. సమావేశానికి రాని అధికారులపై చర్యలు తీసుకోవాలని డిమాండ్ చేశారు. గ్రామాల అభివృద్ధికి అధికారులు, ప్రజాప్రతినిధులు కలిసికట్టుగా ముందుకు సాగాలని పిలుపునిచ్చారు. కార్యక్రమంలో తహసీల్దార్మాలతి, ఎంపీడీవో మార్టిన్ లూథర్, సీడీపీవో హేమభార్గవి, ఆయా గ్రామాల సర్పంచ్ లు, ఎంపీటీసీ సభ్యులు, ఆయా శాఖల అధికారులు పాల్గొన్నారు.
