సారథి న్యూస్, హైదరాబాద్: జేబులో చిల్లిగవ్వ లేకున్నా ఆర్టీసీ బస్సు ఎక్కొచ్చు.. గూగుల్ పే, ఫోన్ పే, పేటీఎంలో డబ్బులు ఉంటే చాలు. చేతిలో నగదు లేకుండా ప్రయాణించేందుకు వీలు కల్పించింది సంస్థ. ఇప్పటివరకు ఆర్టీసీ బస్సు సర్వీసుల్లో క్యాష్ ఉంటేనే ప్రయాణించాల్సి వచ్చేది. కరోనా కట్టడిలో భాగంగా కేంద్రప్రభుత్వం దేశవ్యాప్తంగా జూన్ 30వ తేదీ వరకు లాక్ డౌన్ 5.0 అమలు చేస్తున్న విషయం తెలిసిందే. ఇప్పటికే దేశవ్యాప్తంగా ప్రజారవాణాకు అనుమతి ఇవ్వడంతో బస్సులు, ప్రైవేట్ వాహనాలు రాకపోకలు సాగిస్తున్నాయి. ఇక తెలంగాణ, ఆంధ్రప్రదేశ్లోనూ ఆర్టీసీ బస్సులు రోడ్డెక్కాయి. కరోనా నేపథ్యంలో బస్సుల్లో వెళ్లాలంటే భయపడుతున్నారు. అందులోనూ టికెట్ తీసుకునేందుకు ప్రయాణికులు, అటు టికెట్ ఇష్యూ చేసేందుకు కండక్టర్లు జంకుతున్నారు. ఈ నేపథ్యంలో ఆర్టీసీ సంస్థ క్యాష్ సేవలు అందించేలా ఫోన్ పే, గూగుల్ పే, పేటీఎం వంటి డిజిటల్ సేవలను అందుబాటులోకి తెచ్చింది. అందుకు సంబంధించిన క్యూ ఆర్ కోడ్ను రెడీచేసింది. ప్రయాణికులు క్యూ ఆర్ కోడ్ను స్కాన్ చేసి టికెట్కు సరిపడా డబ్బును చెల్లించవచ్చు. అప్పుడు చిల్లరకు కూడా ఇబ్బంది ఉండదు.
