సారథిన్యూస్, విజయవాడ: విజయవాడలోని ఓ కోవిడ్ సెంటర్లో భారీ అగ్నిప్రమాదం సంభవించింది. ఇప్పటివరకు 11 మంది కరోనా రోగులు మృతిచెందినట్టు సమాచారం. మృతుల సంఖ్య ఇంకా పెరిగే అవకాశం ఉన్నది. ఆంధ్రప్రదేశ్లోని విజయవాడ హోటల్ స్వర్ణప్యాలెస్ను కోవిడ్ కేర్ సెంటర్గా వినియోగిస్తున్నారు. ఈ హోటల్లో దాదాపు 40మంది కరోనా పేషెంట్లు చికిత్స పొందుతున్నారు. ఆదివారం తెల్లవారుజామున షార్ట్సర్క్యూట్తో మంటలు చెలరేగాయి. ఒక్కసారిగా పొగలు కమ్ముకోవడంతో కరోనా బాధితులు కేకలు పెట్టారు. గమనించిన స్థానికులు అగ్నిమాపక సిబ్బందికి సమాచారమందించారు. వెంటనే అక్కడికి అగ్నిమాపక సిబ్బంది, ఎన్డీఆర్ఎఫ్ దళాలు అక్కడికి చేరుకొని సహాయచచర్యలు చేపట్టాయి. అప్పటికే మంటల్లో చిక్కుకొని ఊపిరాడక 9 మంది మృతిచెందారు. మరో ఇద్దరు దవాఖానలో చికిత్సపొందుతూ ప్రాణాలు కోల్పోయారు. గాయపడ్డవారిని సహాయకసిబ్బంది ప్రభుత్వ ఆంబులెన్స్ల్లో వివిధ దవాఖానలకు తరలించి చికిత్స అందిస్తున్నారు.
రూ. 50 లక్షలు పరిహారం
ఈ ఘటనపై సీఎం జగన్ వెంటనే స్పందించారు. బాధితులకు రూ.50 లక్షలు పరిహారమిస్తున్నట్టు ప్రకటించారు. వెంటనే సహాయకచర్యలు చేపట్టాలని సిబ్బందిని ఆదేశించారు. సీఎం ఆదేశాలతో సహాయకచర్యలు ముమ్మరంగా సాగుతున్నాయి.
