కోయిల్​సాగర్​ ఎత్తు పెంచుతాం

• ఉమ్మడి పాలమూరును సస్యశ్యామలం చేస్తాం
• మంత్రి వి.శ్రీనివాస్​ గౌడ్​

సారథి న్యూస్​, మహబూబ్​ నగర్​: ఉమ్మడి పాలమూరు జిల్లాను సస్యశ్యామలం చేయడమే తమ ధ్యేయమని మంత్రి డాక్టర్​ వి.శ్రీనివాస్ గౌడ్ అన్నారు. అవసరమైతే కోయిల్ సాగర్ రిజర్వాయర్ ఎత్తు పెంచి ఈ ప్రాంతాన్ని సస్యశ్యామలం చేస్తామన్నారు. మంగళవారం మహబూబ్ నగర్ జిల్లా దేవరకద్ర మండలం పెద్దరాజమూర్ శివారులోని వాగుపై సుమారు రూ.ఏడుకోట్ల వ్యయంతో నిర్మిస్తున్న చెక్ డ్యామ్ పనులకు ఆయన శంకుస్థాపన చేశారు. ఈ సందర్భంగా మంత్రి మాట్లాడుతూ.. గత ప్రభుత్వాల నిర్లక్ష్యంతోనే ఉమ్మడి మహబూబ్​ నగర్​ జిల్లా ఎడారిగా మారిందన్నారు. దీన్ని దృష్టిలో ఉంచుకుని పాలమూరు ఎత్తిపోతల పథకాన్ని చేపట్టామన్నారు. మహబూబ్​ నగర్ జిల్లాలో వెయ్యి ఎకరాల్లో ఫుడ్​ ప్రాసెసింగ్​ కేంద్రాన్ని ఏర్పాటు చేస్తామని మంత్రి వెల్లడించారు. ఎమ్మెల్యే ఆల వెంకటేశ్వర్​ రెడ్డి మాట్లాడుతూ.. కోయిల్​సాగర్​ ఎత్తు పెంచేందుకు సీఎం కేసీఆర్​ అంగీకరించారని, భవిష్యత్​లో కర్వెన రిజర్వాయర్​ నుంచి కోయిల్​ సాగర్​కు ప్రతినెలా టీఎంసీ నీటిని తీసుకెళ్లేందుకు డిజైన్​ ను కూడా రూపొందించినట్లు తెలిపారు. రామన్​పాడ్​ వరకు జలకళ సంతరించుకునేలా చెక్​ డ్యామ్​లను మంజూరు చేశారని చెప్పారు. ఈ సందర్భంగా జిల్లా ప్రజల నుంచి సీఎం కేసీఆర్​కు కృతజ్ఞతలు తెలిపారు.