న్యూఢిల్లీ: ఔట్ కాకున్నా.. రెండుసార్లు సచిన్ టెండూల్కర్ విషయంలో తప్పుడు నిర్ణయాలు ఇచ్చానని ప్రఖ్యాత అంపైర్ స్టీవ్ బక్నర్ అంగీకరించాడు. ఈ రెండు పొరపాట్లకు తానే బాధ్యుడినని వెల్లడించాడు. అయితే తప్పు చేయాలని ఏ అంపైర్ కోరుకోడని, అనుకోకుండా అలా జరిగిపోయాయన్నాడు. ‘సచిన్ నాటౌటైనా రెండుసార్లు పొరపాటుగా ఔటిచ్చా. తప్పు చేయాలని ఏ అంపైర్ కోరుకోడు. అలా చేస్తే అతని కెరీర్ కూడా ప్రమాదంలో పడుతుంది. 2003 ఆసీస్లో నిర్వహించిన గబ్బా టెస్ట్ మ్యాచ్లో జేసన్ గిలెస్పీ బౌలింగ్లో సచిన్ను ఎల్బీగా ఔటిచ్చా. కానీ బంతి వికెట్ల మీద నుంచి వెళ్తున్నట్లు తేలింది. 2005 ఈడెన్లో అబ్దుల్ రజాక్ బౌలింగ్లో మాస్టర్ క్యాచ్ ఔటైనట్లు ప్రకటించా. కానీ బంతి బ్యాట్ను తాకలేదని తేలింది. అప్పుడు లక్ష మంది ప్రేక్షకుల కేరింతల మధ్య నాకు ఏమీ వినబడలేదు. ఈ రెండు పొరపాట్లకు చింతిస్తున్నా. మనిషి తప్పులు చేయడం సహజం. వాటిని ఒప్పుకోవడం జీవితంలో భాగం’ అని ఓ రేడియో కార్యక్రమంలో ఈ మాజీ అంపైర్ అంగీకరించాడు.
