నీళ్లు లేక, పంటలు పండక బీడుగా మారిన భూమల్లో వ్యవసాయం చెయ్యలేక రైతులు మేస్త్రీలుగా, వలస కూలీలుగా మారి కుటుంబాలను వెళ్లదీస్తూ ఉంటారు. ఇంతలో నీళ్ల కోసం వేసిన బోరులో ఓ చిన్నారి పడిపోతుంది. పాపను రక్షించేందుకు ఆ జిల్లా కలెక్టర్ను సంప్రదిస్తారు అక్కడి ప్రజలు. పొలిటికల్ ఒడిదుడికుడులను తట్టుకొని ఆ కలెక్టర్ ఆ చిన్నారిని ఎలా రక్షించడమే కాదు ఊరిని కూడా బాగు చేసేందుకు సిద్ధపడుతుంది ఆ లేడీ కలెక్టర్. కలెక్టర్ గా నయనతార నటించగా సోషియో పొలిటికల్ థ్రిల్లర్గా ‘ఆరమ్’ సినిమాను 2017లో తమిళంలో గోపి నైనర్ తెరకెక్కించాడు. అయితే గతంలో ఈ సినిమాకి సీక్వెల్ ఉంటుందని నిర్మాత కె.రాజేష్ ప్రకటించారు.
సీక్వెల్ మరింత పటిష్టమైన స్క్రిప్టుతో, సామాజిక సందేశంలో ‘ఆరమ్ 2’ ఉండనుందని స్పష్టం చేశారు కూడా. అయితే దాదాపు రెండేళ్లు గడుస్తున్నా ఈ సినిమా ప్రస్తావన గురించి లేకపోవడంతో దీని సీక్వెల్ ఉండదేమో అని అనుకున్నారంతా. కానీ రీసెంట్ గా ఈ వార్త మళ్లీ వెలుగులోకి వచ్చింది. ‘ఆరమ్’ సీక్వెల్ ఉంటుంది కానీ, హీరోయిన్ నయన్ కాదు అంటూ వదంతులు వచ్చాయి. నయన్కు డేట్స్ అడ్జస్ట్ అవ్వక ఆమె ప్లేస్లో కీర్తి సురేష్ ను తీసుకుంటున్నారన్న వార్త కోలీవుడ్ లో చక్కర్లు కొట్టింది. తాజాగా ‘ఆరమ్ 2’ చిత్రం కోసం కీర్తి సురేష్ను అసలు సంప్రదించలేదంటూ ఈ పుకార్లపై దర్శకుడు గోపి క్లారిటీ ఇచ్చేసాడు. అంతేకాదు.. ‘‘ సీక్వెల్ ఉంటుంది. నయన్తో అయితేనే ఆ సినిమా చేస్తాను. మరొకరితో ఆ సినిమా చేసే ప్రసక్తే లేదు.. వదంతులు నమ్మొద్దు.. ఈ రూమర్లు చూసి నేను కాస్త బాదపడ్డాను కూడా” అని నిర్మొహమాటంగానే అంటూ కరోనా పరిస్థితులు చక్కబడేంత వరకూ ఈ సినిమా గురించి మాట్లాడనని స్పష్టంగా తేల్చి చెప్పేశాడు గోపి.
