- రోడ్డు ప్రమాదంలో ఇద్దరి దుర్మరణం
- మృతులు తండ్రీకొడుకులు
- బిజినేపల్లి మండల కేంద్రంలో దుర్ఘటన
- పరామర్శించిన ఎమ్మెల్యే మర్రి జనార్ధన్రెడ్డి
సారథి, బిజినేపల్లి: అతివేగం ఇద్దరి నిండుప్రాణాలను బలితీసుకుంది. రెండు బైక్లు ఎదురెదురుగా ఢీకొనడంతో తండ్రీకొడుకులు చనిపోయారు. ఈ దుర్ఘటన శుక్రవారం నాగర్ కర్నూల్ జిల్లా బిజినేపల్లి మండల కేంద్రంలోని పోలీస్ స్టేషన్ సమీపంలో జరిగింది. బిజినేపల్లి మండలం వట్టెం గ్రామానికి చెందిన శివకుమార్ గౌడ్(35), బాలయ్య గౌడ్(65) వట్టెం నుంచి వనపర్తికి వెళ్తున్నారు. అలాగే కోడేర్కు చెందిన రాఘవేందర్(35), వినోద్(21) గోపాల్పేటకు వచ్చి తిరిగి వెళ్తున్నారు. బిజినేపల్లిలో రెండు బైక్లు ఢీకొనడంతో తండ్రీకొడుకులు శివకుమార్ గౌడ్, బాలయ్యగౌడ్ అక్కడికక్కడే ప్రాణాలు విడిచారు. వారి తలలు పగిలిపోవడంతో ఆ ప్రాంతమంతా హృదయవిదారకంగా మారింది. రోడ్డంతా నెత్తుటితో తడిచింది. తీవ్రంగా గాయపడిన రాఘవేందర్, వినోద్ను నాగర్కర్నూల్జిల్లా ఆస్పత్రికి తరలించగా పరిస్థితి విషమించడంతో హైదరాబాద్కు తీసుకెళ్లారు. విషయం తెలుసుకున్న నాగర్కర్నూల్ ఎమ్మెల్యే మర్రి జనార్ధన్రెడ్డి జిల్లా ఆస్పత్రిలోని మార్చురీలో మృతదేహాలను పరిశీలించారు. బాధిత కుటుంబసభ్యులను పరామర్శించారు. తక్షణ సహాయం కింద రూ.20వేలు అందజేశారు. ఆయన వెంట పలువురు ప్రజాప్రతినిధులు, టీఆర్ఎస్పార్టీ నాయకులు ఉన్నారు.
ఆ ఇంటికి దిక్కెవరు?
వట్టెం గ్రామానికి చెందిన బాలయ్యగౌడ్ కు ఇద్దరు కొడుకులు, కూతురు. పెద్దకొడుకు అశోక్ అనారోగ్యంతో నెలరోజుల క్రితం చనిపోయాడు. శివకుమార్గౌడ్రోడ్డు ప్రమాదంలో దుర్మరణం పాలయ్యారు. అతని భార్య ప్రస్తుతం ఏడునెలల గర్భిణి. ఆ కుటుంబంలో ప్రస్తుతం బాలయ్య భార్య, అతని కూతురు మాత్రమే మిగిలారు. ఆ కుటుంబ పరిస్థితిని తలుచుకొని బంధువులు, గ్రామస్తులు కన్నీరుమున్నీరవుతున్నారు.
