బిజినేపల్లిలో మాయదారి మల్లిగాడు

• నకిలీ కాల్ లెటర్ తో నిరుద్యోగికి టోకరా
• చాలా మంది నుంచి లక్షలాది రూపాయలు వసూలు
• దళిత బంధువులో పలువురికి ట్రాక్టర్లు ఇప్పిస్తానని మోసం
• పడిగాపులు గాస్తున్న బాధితులు

సామాజికసారథి, బిజినేపల్లి: నాగర్​కర్నూల్​ జిల్లా బిజినేపల్లిలో ఓ మాయదారి మల్లిగాడు నిరుద్యోగులను నిలువునా ముంచాడు. ఉద్యోగం ఇప్పిస్తానని రూ.4లక్షలు తీసుకుని ఉత్తుత్తి కాల్​లెటర్​ఇచ్చి ఉడాయించాడు. ఈ ఘటన ఆలస్యంగా బుధవారం వెలుగుచూసింది. బాధితుడి కథనం.. బిజినేపల్లి మండల కేంద్రానికి చెందిన మల్లేశ్ గౌడ్ చిన్న చిన్న దందాలు చేస్తుంటాడు. ఈ క్రమంలో వెల్కిచర్ల గ్రామానికి చెందిన ఓ నిరుద్యోగికి ఖమ్మం జిల్లాలో పంచాయతీ కార్యదర్శిగా ఉద్యోగం ఇప్పిస్తానని గతకొద్ది రోజుల క్రితం నాలుగు లక్షల రూపాయలు తీసుకున్నాడు. నకిలీ కాల్​లెటర్​చేతిలో పెట్టాడు. ఉద్యోగం రాకపోవడంతో మల్లేష్​గౌడ్​ను ఆశ్రయించాడు. అందుకు ఆయన ఓ చెక్కు రాసి ఇచ్చాడు. చెక్కు చెల్లుబాటు కాకపోవడంతో ఇంటికి వెళ్లి నిలదీయగా.. అప్పటికే పరారయ్యాడు. ఇలా ఒక్కరు కాదు ఇద్దరు కాదు చాలామంది బాధితులు మాయదారి మల్లేశ్​గౌడ్​చేతిలో మోసపోయారు. బయటికి చెప్పుకోలేక నిత్యం బిజినేపల్లిలో పడిగాపులు గాస్తున్నారు. ఈ విషయం తెలుసుకున్న ‘సామాజికసారథి’ వారం రోజులుగా పలువురు బాధితుల నుంచి వివరాలు సేకరించగా రేవల్లి గ్రామానికి చెందిన కొందరి వద్ద మెడికల్​సీట్లు ఇప్పిస్తానని బాండు పేపర్​రాసిచ్చి ఒక్కొక్కరి వద్ద రూ.9 నుంచి రూ.12 లక్షలు వసూలు చేశాడు. అంతేకాకుండా దళితబంధువు లో ట్రాక్టరు ఇప్పిస్తానంటూ లక్షలాది రూపాయలు వసూలు చేసుకుని ఉడాయించాడు.

మహాదేవునిపేట గ్రామానికి చెందిన ఓ వ్యక్తికి బిజినేపల్లిలో నకిలీ ప్లాట్లు అమ్మకాలుచేసి ఆ వ్యక్తి నుంచి రూ.9 లక్షలను వసూలు చేసుకుని రిజిస్ట్రేషన్ నాటికి ఆ ప్లాటు మల్లేశ్​గౌడ్​కు చెందినది కాదని తెలియడంతో ఆ వ్యక్తి నివ్వెరపోయి తనకు డబ్బులు ఇవ్వాలని డిమాండ్ చేశాడు. ఆ వ్యక్తికి కూడా ఒక చెల్లని చెక్కు ఇచ్చి అక్కడి నుంచి తప్పించుకున్నాడు. అంతే కాకుండా బిజినేపల్లిలో పలువురు గౌడ సంఘానికి చెందిన వ్యక్తుల వద్ద మద్యం సరఫరా చేస్తానని లక్షలాది రూపాయలు తీసుకుని వారికి కూడా టోకరా వేశాడు. ఈ తతంగమంతా బిజినేపల్లిలో గుసగుసలుగా చేరి బాధితుల బాధలు ఒకరు ఒకరు చెప్పుకొని కన్నీరుమున్నీరవుతున్నారు. కనీసం బాధితులు పోలీస్​స్టేషన్​కు వెళ్లి బాధలు చెప్పుకుని ఫిర్యాదుచేస్తే తమకు న్యాయం జరుగుతుందో లేదోనని మదనపడుతున్నారు. ఇకనైనా మాయాదారి మల్లిగాడి నుంచి న్యాయం చేయాలని కోరుతున్నారు.