- ఆర్ఎంపీ వచ్చీరాని ట్రీట్మెంట్
- పరిస్థితి విషమించడంతో చిన్నారి మృతి
- తల్లిదండ్రులతో గోప్యంగా బేరం
సామాజిక సారథి, బిజినేపల్లి: వైద్యం వికటించడంతో బాలుడు మృతిచెందిన సంఘటన విషాదకర సంఘటన నాగర్కర్నూల్ జిల్లా బిజినేపల్లి మండలం గంగారం పంచాయతీ పరిధిలోని ఓ గిరిజన తండాలో గురువారం జరిగింది. బాధితుల కథనం మేరకు.. తండాకు చెందిన బాలుడు(11) మూడు రోజులుగా తీవ్రమైన జ్వరంతో బాధపడుతున్నాడు. తల్లిదండ్రులు బిజినేపల్లి మండల కేంద్రంలోని ఓ ఆర్ఎంపీ వద్దకు వైద్యం కోసం తీసుకెళ్లారు. అతను వచ్చీరాని వైద్యంతో సదరు బాలుడికి సెలైన్ ఎక్కించాడు. కొద్దిసేపటి తర్వాత పరిస్థితి విషమించడంతో సదరు ఆర్ఎంపీ సూచన మేరకు తల్లిదండ్రులు నాగర్కర్నూల్కు తీసుకెళ్లారు. అక్కడి నుంచి మహబూబ్నగర్కు హుటాహుటిన తీసుకెళ్లారు. బాలుడికి మరింత సీరియస్గా ఉండటంతో హైదరాబాద్కు తరలించారు. ఆరోగ్య పరిస్థితి మరింత విషమించడంతో మార్గమధ్యంలోనే చనిపోయాడు. చిన్నారి మృతదేహాన్ని తల్లిదండ్రులు ఆర్ఎంపీ వద్దకు తీసుకొచ్చి ఆందోళనకు దిగారు. ‘ఎంత పనిచేశావ్’ అంటూ కన్నీరుమున్నీరయ్యారు. తాను చేసిన వైద్యం కొద్దిగా పొరపాటు జరిగిందని వారిని సముదాయించే ప్రయత్నం చేసినా వారు వినిపించుకోలేదు. సదరు ఆర్ఎంపీ విషయం బయటికి పొక్కకుండా బేరం కుదుర్చుకున్నట్లు స్థానికంగా ప్రచారం సాగింది. ఈ తతంగమంతా జిల్లా వైద్యాధికారి కార్యాలయానికి కూతవేటు దూరంలో ఉన్న ఓ ప్రైవేట్ క్లినిక్లో జరగడం గమనార్హం.
