సారథి న్యూస్, వాజేడు: ములుగు జిల్లా ఎస్పీ డాక్టర్ సంగ్రామ్ సింగ్ జి.పాటిల్ గురువారం ములుగు జిల్లా ఏరియా ఆస్పత్రిలో కరోనా వ్యాక్సిన్ తీసుకున్నారు. ఈ సందర్భంగా ఆయన మాట్లాడుతూ.. కరోనా వైరస్ వ్యాప్తి సమయంలో జిల్లా పోలీస్ సిబ్బంది వెనకడుగు వేయకుండా తమ కుటుంబాలకు దూరంగా ఉంటూ సేవలు అందించారని కొనియాడారు. మనదేశంలో తయారైన వ్యాక్సిన్ అత్యంత సురక్షితమైందని వివరించారు. భారత శాస్త్రవేత్తలు, డాక్టర్లు తయారుచేసిన వ్యాక్సిన్ ప్రపంచానికి ఆదర్శంగా నిలిచిందన్నారు. కరోనా వ్యాక్సిన్ తీసుకున్న పోలీస్ సిబ్బందికి ఆరోగ్యపరంగా ఎలాంటి సమస్యలు లేవని స్పష్టం చేశారు. వ్యాక్సిన్ వేయించుకున్నప్పటికీ తప్పనిసరిగా మాస్కులు కట్టుకోవాలని, చేతులు శుభ్రంగా కడుక్కోవాలని ప్రజలను కోరారు. కార్యక్రమంలో జిల్లా వైద్యాధికారి అప్పయ్య, ఎస్బీ ఇన్స్పెక్టర్, రెహమాన్, ములుగు ఎస్సై హరికృష్ణ పాల్గొన్నారు.
