లక్నో: దళిత యువతిపై లైంగికదాడి, హత్యతో యూపీలో హత్రాస్ ప్రాంతం అట్టుడుకుతోంది. మరోవైపు దేశవ్యాప్తంగా పలు చోట్ల దళితసంఘాలు ఆందోళనలు చేస్తున్నాయి. అయితే గురువారం బాధిత కుటుంబాన్ని పరామర్శించేందుకు హత్రాస్ వెళ్లన కాంగ్రెస్ యువనేత రాహుల్, ప్రియాంకా గాంధీని పోలీసులు అదుపులోకి తీసుకున్నారు. రాహుల్ అరెస్ట్తో స్థానికంగా తీవ్ర ఉద్రిక్తత చోటుచేసుకుంది.
యూపీ సీఎం యోగి ఆదిత్యానాథ్‌, ప్రధానమంత్రి నరేంద్ర మోదీలకు వ్యతిరేకంగా కాంగ్రెస్ కార్యకర్తలు నినాదాలతో హోరెత్తించారు.శాంతియుతంగా హత్రాస్ వెళ్తున్న తమపట్ల పోలీసులు అమానుషంగా వ్యవహరించారని రాహుల్ గాంధీ మండిపడ్డారు. యమున ఎక్స్‌ప్రెస్‌ వేపై తమను పోలీసులు అడ్డగించి తనను తోసివేస్తే కిందపడ్డానని రాహుల్ పేర్కొన్నారు. అయితే కరోనా నిబంధనల మేరకు రాహుల్ను అరెస్ట్ చేసినట్టు పోలీసులు తెలిపారు. రాహుల్ వస్తున్నారని తెలుసుకుని కార్యకర్తలు, దళితసంఘాలు పెద్ద ఎత్తున హత్రాస్ కు చేరుకున్నారు. దీంతో అక్కడ కొంత హైటెన్షన్‌ నెలకొంది. యూపీలోని హత్రాస్ లో పొలం పనులకు వెళ్లిన దళిత యువతిపై దుండగులు సామూహిక లైంగిక దాడికి పాల్పడి తీవ్రంగా గాయపరిచారు. బాధితురాలు మృత్యువుతో పోరాడుతూ ఢిల్లీ ఆస్పత్రిలో మంగళవారం వేకువజామున తుదిశ్వాస విడిచారు.
