ముంబై: పరిస్థితులు ఎలా ఉన్నా ఈ ఏడాది ఐపీఎల్ను నిర్వహించాలనే పట్టుదలతోనే బీసీసీఐ ముందుకెళ్తున్నట్లు తెలుస్తోంది. టీ20 ప్రపంచకప్పై క్రికెట్ ఆస్ట్రేలియా వ్యాఖ్యలు అలా వచ్చాయే లేదో.. ఐపీఎల్ కోసం తాత్కాలిక షెడ్యూల్కు అనుకున్నట్లు సమాచారం. సెప్టెంబర్ 26 నుంచి నవంబర్ 8 వరకు లీగ్ను నిర్వహించాలని ఆలోచనలు చేస్తున్నట్లు బీసీసీఐ వర్గాలు తెలిపాయి. అయితే టీ20 ప్రపంచకప్ అధికారిక నిర్ణయం వెలువడిన తర్వాత, ఇతర అంతర్జాతీయ టోర్నీలను చూసుకుని ఈ తేదీల్లో కాస్త మార్పులు చేసే అవకాశాలు కూడా ఉన్నాయి.
ఓవరాల్గా 43 రోజులను లీగ్ కోసం కేటాయించినట్లు తెలుస్తుండడంతో ఈసారి మ్యాచ్ల సంఖ్య తగ్గనుంది. విదేశాల్లో లీగ్ను నిర్వహించే ప్రతిపాదనలు వస్తున్నా భారత్లోనే ఏర్పాటు చేయాలని భావిస్తున్నారు. వర్షం తక్కువగా ఉండే నగరాలను ఎంచుకుని, ఖాళీ స్టేడియాల్లో మ్యాచ్లు నిర్వహించేలా ప్రణాళికలు సిద్ధం చేస్తున్నారు. మరోవైపు స్వదేశమా, విదేశామా? అనుకోకుండా ఎక్కడో ఓ దగ్గర లీగ్ నిర్వహించాలని ఫ్రాంచైజీ యజమానులు కోరుకుంటున్నారు. లీగ్ నిర్వహణ తలకు మించిన భారమే అయినా.. బీసీసీఐ అన్ని చర్యలు తీసుకుంటుందని చెబుతున్నారు. టీవీల్లో మ్యాచ్లు వస్తే చాలు.. తమతో పాటు స్పాన్సర్లు అందరూ సంతోషిస్తారని కింగ్స్ ఎలెవన్ సహా యజమాని నెస్ వాడియా అన్నాడు.
