సారథి న్యూస్,నాగర్కర్నూల్: అభివృద్ధి సంక్షేమ పథకాల అమలు పర్యవేక్షణకు ‘దిశ’ చక్కని వేదిక అని నాగర్ కర్నూల్ ఎంపీ, ‘దిశ’ కమిటీ చైర్మన్ పోతుగంటి రాములు అన్నారు. గురువారం నాగర్ కర్నూల్ జిల్లా కేంద్రంలోని తిరుమల టవర్స్ లో నిర్వహించిన జిల్లా అభివృద్ధి సమన్వయ, పర్యవేక్షణ కమిటీ(దిశ) సమావేశం ఎంపీ అధ్యక్షత జరిగింది. ఈ సందర్భంగా ఎంపీ రాములు మాట్లాడుతూ.. దిశ కమిటీ కేంద్ర ప్రభుత్వ పథకాల ద్వారా వచ్చే నిధులు ఖర్చు, పథకాలు అమలు తదితరాలను పర్యవేక్షిస్తుందన్నారు. ఉపాధి హామీ పథకాన్ని వ్యవసాయానికి అనుసంధానం చేయాలని ఏకగ్రీవంగా ప్రతిపాదించగా, దిశ కమిటీ తీర్మానించింది. నాగర్కర్నూల్ పార్లమెంట్ నియోజకవర్గం మొత్తానికి కలిపి రూ.140 కోట్ల వ్యయంతో 42 చెక్ డ్యామ్లు మంజూరు చేసినట్లు తెలిపారు. భారత్, చైనా సరిహద్దులో అసువులు బాసిన కల్నల్ సంతోష్ బాబు ఆత్మకు శాంతి చేకూరాలని రెండు నిమిషాల పాటు మౌనం పాటించారు. సమావేశంలో ప్రభుత్వ విప్, అచ్చంపేట ఎమ్మెల్యే గువ్వల బాలరాజు, ఎమ్మెల్యే జైపాల్యాదవ్, కలెక్టర్ శ్రీధర్, జడ్పీ చైర్పర్సన్ పెద్దపల్లి పద్మావతి, అడిషనల్ కలెక్టర్ మను చౌదరి, ట్రైనీ కలెక్టర్ చిత్రమిశ్రా, ఎంపీపీలు, మున్సిపల్ చైర్మన్లు, జిల్లా అధికారులు హాజరయ్యారు.
