- డిసెంబర్ 3 నుంచి బ్రిస్బేన్లో తొలి టెస్ట్
న్యూఢిల్లీ: కరోనా మహమ్మారి తర్వాత భారత్ క్రికెట్ జట్టు అతి పెద్ద టెస్ట్ సిరీస్కు రెడీ అవుతోంది. డిసెంబర్ 3 నుంచి ఆస్ర్టేలియాలో పర్యటించేందుకు గ్రీన్ సిగ్నల్ ఇచ్చేసింది. దీంతో ఇండో–ఆసీస్ టెస్ట్ సిరీస్ షెడ్యూల్ ను బీసీసీఐ, క్రికెట్ ఆస్ర్టేలియా (సీఏ) విడుదల చేశాయి. నాలుగు టెస్ట్ల్లో భాగంగా తొలి మ్యాచ్ బ్రిస్బేన్లో జరగనుంది. ఆసీస్లో కరోనా ప్రభావం ఎక్కువగా లేకపోవడంతో నాలుగు మ్యాచ్లకు నాలుగు వేదికలను ఖరారు చేశారు.
అప్పటివరకు వైరస్ వ్యాప్తి పెరిగితే అన్ని మ్యాచ్లు ఒకే వేదికపై నిర్వహించేలా కూడా ప్రణాళికలు రూపొందించారు. తర్వాతి మూడు మ్యాచ్లు వరుసగా అడిలైడ్ (డే అండ్ నైట్ టెస్ట్), మెల్బోర్న్, సిడ్నీలో జరగనున్నాయి. 2020–21 సీజన్కు గానూ సీఏ తమ మొత్తం షెడ్యూల్ను ప్రకటించనుంది. దాదాపు ఐదుదేశాలు ఆసీస్లో పర్యటించేలా ఈ షెడ్యూల్ ను రూపొందిస్తున్నారు.
కరోనాతో ఆర్థికవ్యవస్థ దెబ్బతిన్న నేపథ్యంలో ఐదో టెస్ట్ కూడా ఆడదామని సీఏ ప్రతిపాదించినా.. బీసీసీఐ ప్రెసిడెంట్ గంగూలీ తిరస్కరించిన విషయం తెలిసిందే. దీంతో ఈ సిరీస్ను నాలుగు టెస్ట్లకే పరిమితం చేశారు. ఈ సిరీస్ కోసం వెళ్లే టీమిండియా అవసరమైతే 14 రోజులు ఐసోలేషన్లో ఉండేందుకు కూడా సిద్ధమేనని బీసీసీఐ కోశాధికారి అరుణ్ ధుమాల్ వెల్లడించారు.
