సారథి న్యూస్, పెబ్బేర్: రాజకీయ నాయకులు ఆ ఊరు వైపునకు ఓట్లకు తప్ప ఏనాడూ కన్నెత్తిచూడరు. గ్రామంలో ఏ సమస్యలు ఉన్నా పట్టించుకోరు..! వారం రోజులుగా కురుస్తున్న భారీవర్షాలకు ఆ ఊరుకు వెళ్లే రోడ్డంతా బురదమయంగా మారింది. రోడ్డు సక్రమంగా లేకపోవడంతో ఏనాడూ 108 అంబులెన్స్ వచ్చిన దాఖలాల్లేవ్. వనపర్తి జిల్లా శ్రీరంగపూర్ మండలం తాటిపాముల పంచాయతీకి మూడు కి.మీ. దూరంలో ఉన్న తాటిపాముల తండా(కుంటివానితండా)కు ప్రధాన రహదారి తెగిపోవడంతో స్థానిక గిరిజనులు తీవ్ర ఇబ్బందులు పడుతున్నారు. తండాకు పోవాలంటే కిలోమీటర్దూరంలో వాహనాలను ఆపివేసి నడుచుకుంటూ పోవాల్సి ఉంటుంది. ఇటీవల ఓ వృద్ధుడు తీవ్ర అనారోగ్యానికి గురికావడంతో అంబులెన్స్రాలేని పరిస్థితుల్లో మంచంపైన తీసుకెళ్లారు. ‘గ్రామ పంచాయతీ నుంచి మమ్మల్ని పట్టించుకోవడానికి ఎవరూ రాలేదు. ఓట్లకు అడగడానికి వస్తే మళ్లీ ఓట్లకు మాత్రమే వస్తారని’ తండా గిరిజనులు ఆవేదన వ్యక్తం చేస్తున్నారు.
