న్యూఢిల్లీ: జాతీయ ట్రయల్స్లో ఓడినా.. ఈసారి టోక్యో ఒలింపిక్స్కు కచ్చితంగా అర్హత సాధిస్తానని భారత రెజ్లర్ సాక్షి మాలిక్ తెలిపింది. గత ట్రయల్స్ నుంచి ఓటమి పాఠాన్ని నేర్చుకున్నానని పేర్కొంది. ఆసియా క్వాలిఫయర్స్ కోసం నిర్వహించిన 62 కేజీల ట్రయల్స్లో సోనమ్ మాలిక్ చేతిలో సాక్షి రెండుసార్లు ఓడింది. ‘తొలి బౌట్లో నేను గెలిచాను. కానీ చివరి సెకన్లలో పాయింట్లు కోల్పోవడంతో బౌట్ చేజారింది. రెండో బౌట్లో 2–1తో ముందంజలో ఉన్నా. కానీ ఆఖరి నిమిషంలో పిన్లో ఓడిపోయా. అయితే నేనేమీ బలహీనమని చెప్పుకోను. నాలోనూ స్ఫూర్తి, ఉత్సాహం ఉంది. ఆ రెండు బౌట్ల నుంచి చాలా నేర్చుకున్నా. చివరి సెకన్లలో ఎలా పోటీపడాలో తెలుసుకున్నా. ఓ పెద్ద రెజ్లర్ చేతిలో నేను ఓడిపోలేదు. కాకపోతే నేను వందశాతం సత్తా చూపలేకపోయా’ అని సాక్షి చెప్పుకొచ్చింది.
