- వచ్చే వారం ఐసీసీ అధికారిక ప్రకటన
న్యూఢిల్లీ: కరోనా దెబ్బకు ఇప్పటికే పలు టోర్నీల రద్దుతో అస్తవ్యస్తమైన క్రీడా ప్రపంచానికి ఇప్పుడు మరో దెబ్బ పడనుంది. ప్రతిష్టాత్మక టీ20 ప్రపంచకప్ కూడా వైరస్ ఖాతాలో పడేలా కనిపిస్తోంది. అక్టోబర్, నవంబర్లో జరగాల్సిన ఈ టోర్నీని వాయిదావేసే దిశగా ఐసీసీ వేగంగా అడుగులు వేస్తోంది. ఈనెల 26 నుంచి 28వ తేదీ వరకు జరిగే గవర్నింగ్ బాడీ సమావేశంలో దీనిపై తుదినిర్ణయం తీసుకోనున్నారు. ఒకవేళ ఈవెంట్ను వాయిదా వేస్తే తిరిగి ఎప్పుడు నిర్వహిస్తారన్న దానిపై కూడా సందిగ్ధత నెలకొంది. ప్రస్తుతాని ఐసీసీ, క్రికెట్ ఆస్ర్టేలియా(సీఏ) మూడు ప్రత్యామ్నాయాలను పరిశీలిస్తోందని సమాచారం.
వచ్చే ఏడాది బెటర్
కరోనా దెబ్బకు ఈ టోర్నీ వాయిదావేసినా పెద్దగా ఇబ్బందులు లేవని చెబుతున్న ఆస్ర్టేలియా.. వచ్చే ఏడాది మార్చి, ఏప్రిలో మాత్రం ఈవెంట్ను నిర్వహించాలని పట్టుదలగా కనిపిస్తోంది. ఇదే జరిగితే ఐపీఎల్ను ఏప్రిల్లో మొదలుపెట్టాల్సి ఉంటుంది. దీనివల్ల ఇండియాలో ఇంగ్లండ్ పర్యటన సందిగ్ధంలో పడుతుంది. దీనికి టీవీ ప్రత్యక్ష ప్రసారదారులు ఒప్పుకోకపోవచ్చు. రెండో ప్రత్యామ్నాయంగా ఈ ఏడాది టోర్నీని భారత్లో నిర్వహించడం, ఇక్కడ జరగాల్సిన 2022 టోర్నీని ఆస్ర్టేలియాకు తరలించడం. అంటే పరస్పరం అంగీకారంతో టోర్నీలను మార్చుకోవడం. దీనికి బీసీసీఐ ఒప్పుకోకపోవచ్చు. ఎందుకంటే ఈ ఏడాది చివరిలో నాలుగు టెస్ట్ల సిరీస్ కోసం ఆసీస్కు వెళ్లాలని బీసీసీఐ ప్రణాళికలు సిద్ధం చేస్తోంది. ఈ రెండు కాకుండా టోర్నీని 2022లో నిర్వహించడం మూడో ప్రత్యామ్నాయం. ఆ ఏడాదిలో ఐసీసీకి సంబంధించిన వేరే టోర్నీలు కూడా లేకపోవడం అనుకూలాంశం. అయితే ఈ మూడింటిలో ఆస్ర్టేలియా దేనిని ఎంచుకుంటుందో చూడాలి. ఇప్పటికైతే వచ్చే ఏడాది మార్చి, ఏప్రిల్ విండో కోసమే ఆస్ర్టేలియా పట్టుపట్టే అవకాశాలున్నాయి.
ఐపీఎల్కు ఓకే
టీ20 ప్రపంచకప్ను అధికారికంగా వాయిదా వేస్తే.. అక్టోబర్, నవంబర్ విండోను ఉపయోగించుకోవాలని బీసీసీఐ ప్రయత్నాలు చేస్తోంది. ఈ విండోలో ఐపీఎల్ను నిర్వహించాలని భావిస్తోంది. ఇప్పుడున్న పరిస్థితుల్లో మిగతా బోర్డులు కూడా బీసీసీఐకి ఎదురుచెప్పే సాహసం చేయలేవు. కాబట్టి ఓ రకంగా ఐపీఎల్కు మార్గం సుగమమైనట్లే. అవసరమైతే విదేశీ ప్లేయర్ల కోసం చార్టెడ్ విమానాలు నడిపేందుకు కూడా బీసీసీఐ సిద్ధమవుతోందని సమాచారం. ఐపీఎల్ను నిర్వహించడంతో దాదాపు రూ.నాలుగువేల కోట్ల రెవెన్యూ సమకూరుతుందని, అప్పుడు మిగతా బోర్డులకు కూడా ఆర్థికసాయం అందజేయొచ్చని భావిస్తున్నారు. ఏదేమైనా మూడురోజుల పాటు వీడియో కాన్ఫరెన్స్లో జరిగే ఐసీసీ కీలక సమావేశాల్లో ఏదో ఒకటి తేలనుంది. ఇక ఐసీసీ కొత్త చైర్మన్ ఎంపికపై కూడా ఈ సమావేశంలో నిర్ణయం తీసుకోనున్నారు. అయితే ప్రస్తుతం ఉన్న చైర్మన్ శశాంక్‌ మనోహర్‌కు మరో రెండునెలలు పొడిగిస్తారనే ఊహాగానాలు కూడా వస్తున్నాయి.
