- ఒక క్లిక్తో కోటి బుక్స్
- కేజీ టు పీజీ బుక్స్ ఒకేచోట
- హెచ్‌ఆర్‌డీ మినిస్ట్రీ ప్లాన్
సారథి న్యూస్, హైదరాబాద్: కాంపిటేటివ్ ఎగ్జామ్స్కు ప్రిపేరయ్యే అభ్యర్థులైనా.. పోటీ పరీక్షలకు సన్నద్ధమయ్యే స్టూడెంట్స్ అయినా.. ఫలానా బుక్ దొరకడం లేదన్న బెంగ అక్కర్లేదు. కాలేజీ లైబ్రరీలో ఒకే ఒక బుక్ ఉంటే దానిని మరొకరికి ఇచ్చేశారు.. తానెలా చదువుకునేది? అన్న దిగులొద్దు. యూపీఎస్సీ నిర్వహించే సివిల్స్, స్టేట్ సర్వీస్‌ కమిషన్‌ నిర్వహించే గ్రూప్స్, ఎన్‌సీఈఆర్‌టీ సిలబస్‌కు సంబంధించిన ఎన్నో రిఫరెన్స్ బుక్స్ ఎలా కొనాలనే ఆలోచనా వద్దు. ఇప్పుడివన్నీ ఒకేచోటే అందుబాటులోకి వచ్చాయి. కేజీ నుంచి పీజీ వరకు అన్ని రిఫరెన్స్ బుక్స్ అన్ని నెట్టింటిలో దొరుకుతున్నాయి. కావాల్సిన బుక్స్ను ఆన్‌లైన్‌లో చదువుకోవచ్చు. వెబ్‌సైట్‌ నుంచి పీడీఎఫ్ ఫైల్ డౌన్‌లోడ్‌ చేసుకోవచ్చు. కావాలనుకుంటే వాటికి సంబంధించిన వీడియోలు చూడొచ్చు. ఆడియోలు వినొచ్చు. అందుకు కావాల్సిందల్లా ఇంటర్నెట్ సదుపాయమే. ఒకటి కాదు.. రెండు కాదు.. కోటికిపైగా పుస్తకాలను, ఆర్టికల్స్, రచనలను, విమర్శనా వ్యాసాలు చదువుకోవచ్చు. ఐఐటీ ఖరగ్‌పూర్‌ సాయంతో కేంద్ర మానవ వనరుల అభివృద్ధి మంత్రిత్వశాఖ ఈ భారీ కసరత్తును చేసింది. https://ndl.iitkgp.ac.in ఈ లింక్ను క్లిక్ చేసి అవసరమైన బుక్స్ను చదువుకునే సదుపాయాన్ని అందుబాటులోకి తెచ్చింది. జాతీయ విద్యాపరిశోధన, శిక్షణ మండలి(ఎన్‌సీఈఆర్‌టీ) బుక్స్ను కంప్యూటరైజ్డ్ చేసి ఇందులో పొందుపరిచారు. త్వరలోనే మెుబైల్‌ యాప్‌ను కూడా అందుబాటులోకి తెచ్చేందుకు ప్రయత్నాలు చేస్తున్నారు.
డిజిటల్‌ లైబ్రరీ ప్రత్యేకతలు
– 70కి పైగా భాషల్లో.. కోటికిపైగా ఈ–బుక్స్
– 2లక్షల మంది ప్రముఖుల మూడులక్షల ఆర్టికల్స్
– లక్ష మంది భారతీయ స్టూడెంట్స్ థీసిస్‌లు
– రైటింగ్ పేపర్లు, పలు భాషల్లో ఆడియో లెక్చర్లు
–18వేలకు పైగా వీడియో ఉపన్యాసాలు
– 33వేలకు పైగా గత క్వశ్చన్ పేపర్లు
– యూనివర్సిటీలు, స్కూలు బోర్డుల క్వశ్చన్ పేపర్లు, ఆన్సర్ షీట్లు
– అగ్రికల్చర్, సైన్స్, టెక్నాలజీ రంగాల సమాచారం.
– సమాచార నిధి, వార్షిక నివేదికలు, 12 వేలకుపైగా వివిధ నివేదికలు
– సాంకేతిక కోర్సుల నివేదికలు, న్యాయ తీర్పులు
రిజిస్ట్రేషన్‌ ఈజీ
డిజిటల్‌ లైబ్రరీలో పుస్తకాలు తీసుకోవడం చాలా ఈజీ. ఈ–మెయిల్‌ ఐడీ, తాము చదువుతున్న కోర్సు, యూనివర్సిటీ పేరు నమోదు చేసి రిజిస్ట్రేషన్‌ చేస్తే చాలు. ఈ వివరాలను నమోదుచేసిన తర్వాత తాము పేర్కొన్న ఈ–మెయిల్‌ ఐడీకి లింకు వస్తుంది. ఈ లింకుపై క్లిక్ చేస్తే రిజిస్ట్రేషన్‌ పూర్తవుతుంది. ఆ తర్వాత ఈ–మెయిల్‌ ఐడీ, పాస్‌వర్డ్‌ నమోదుచేసి లైబ్రరీలో లాగిన్‌ కావచ్చు. స్టూడెంట్స్, అభ్యర్థులు తమకు అవసరమైన విభాగాల వారీగా పుస్తకాలు, వీడియో, ఆడియో పాఠాలు, లెక్చర్లు, ఉపన్యాసాలు వెతికి డౌన్‌లోడ్‌ చేసుకోవచ్చు. కాంపిటేటివ్ ఎగ్జామ్స్కు ప్రిపేరయ్యే స్టూడెంట్స్కు ఈ డిజిటల్‌ లైబ్రరీతో ఎంతో ప్రయోజనం కలుగుతుంది. గత పరీక్షల్లో ఎలాంటి ప్రశ్నలు అడిగారు? వాటిని ఎలా పరిష్కరించారో తెలుసుకోవచ్చు. అయితే వాటికి సంబంధించి మార్కెట్‌లో ఉన్న పుస్తకాలను కొనుక్కోవాల్సిన అవసరం లేదు. ఒక్క క్లిక్తో వాటిని పొందవచ్చు.
