- ఓ అనాథ వృద్ధుడికి అన్నం తినిపించి..
- మానవత్వం చాటిన సబ్ రిజిస్ట్రార్ తస్లీమా మహమ్మద్
సారథి న్యూస్, ములుగు: పేదల ఆకలి తీరుస్తున్నారు.. అభాగ్యులకు నేనున్నామని అభయమిస్తున్నారు ములుగు సబ్ రిజిస్ట్రార్ తస్లీమా మహమ్మద్. ఆకలితో అలమటిస్తున్న ఓ అనాథ వృద్ధుడికి తన స్వహస్తాలతో అన్నం తినిపించి మానవత్వం చాటుకున్నారు. తస్లీమా ఉద్యోగరీత్యా బుధవారం ఉదయం హన్మకొండ నుంచి ములుగు వస్తున్న క్రమంలో మల్లంపల్లి సమీపంలో ఫంక్షన్ హాల్ వద్ద రోడ్డు పక్కన ఓ అనాథ వృద్ధుడు ఆకలికి తాళలేక ఎంగిలి విస్తరి ఆకులు తింటూ కనిపించాడు. బస్సులో ఉన్న ఆమె ఇది గమనించి చలించిపోయారు. తన వెంట తెచ్చుకున్న లంచ్ బాక్స్ను అతనికి తినిపించారు. ఆకలితో అలమటిస్తూ ఎవరు కనిపించినా ఎలాంటి ప్రతిఫలాపేక్ష లేకుండా బుక్కెడు అన్నం పెట్టాలని కోరారు. ఇతరుల ఆకలిని తీర్చడంలో ఉన్న సంతృప్తి మరెక్కడా దొరకదన్నారు. సామాజిక సేవలో పాలుపంచుకోవాలని ఆమె పిలుపునిచ్చారు.
