సారథి, భద్రాచలం: ఎట్టకేలకు ఉత్కంఠకు తెరపడింది. ఆరు రోజులుగా మావోయిస్టుల చెరలో ఉన్న కోబ్రా జవాన్ రాకేశ్వర్ సింగ్ మన్హాస్ గురువారం సాయంత్రం క్షేమంగా విడుదలయ్యారు. ఈనెల 3న ఎన్‌కౌంటర్ సమయంలో మావోయిస్టులకు చిక్కిన్ జవాన్‌ను వారు తమ వెంట బందీగా తీసుకెళ్లారు. అతనికి ఏ హానీ తలపెట్టకుండా క్షేమంగా విడిచిపెట్టాలని కుటుంబసభ్యులు, పలు ప్రజాసంఘాలు విజ్ఞప్తిచేశారు. జవాన్ కూతురు కన్నీరు పెడుతూ తన నాన్నను ఏమీ చేయొద్దని వేడుకున్నతీరును ప్రతి ఒక్కరినీ కంటతడిపెట్టించింది. మధ్యవర్తుల ద్వారా జవాన్‌ను విడుదల చేస్తామని మావోయిస్టులు సైతం ప్రకటించడంతో మధ్యవర్తిత్వం కోసం ఇద్దరు సభ్యుల బృందాన్ని ఛత్తీస్గఢ్ ప్రభుత్వం నియమించింది.
ఈ మేరకు పద్మశ్రీ అవార్డు గ్రహిత ధరంపాల్ సైని, గోండ్వానా సమాజ్ ప్రసిడెంట్ తెల్లం బోరియాతో సహా ప్రభుత్వం తరఫునన ఇద్దరు సభ్యులు, ఏడుగురు జర్నలిస్టులు కలిసి మొత్తం 11 మంది బస్తర్ అడవికి చేరుకున్నారు. వందలాది గ్రామస్తుల సమక్షంలో జవాన్‌ను మావోయిస్టులు ఆ బృందానికి అప్పగించినట్లు ప్రకటించారు. మావోయిస్టుల చెర నుంచి జవాన్ విడుదల కావడంతో అందరూ ఊపిరి పీల్చుకున్నారు..
