సామాజిక సారథి, నెట్వర్క్: ఇంటింటా దీపావళి వేడుకలు అంబరాన్నంటాయి. గుమ్మాల ముందు వెలిగించిన దీపాలు కొత్త శోభను తెచ్చిపెట్టాయి. పటాకుల ఢాం.. ఢాం చప్పుడు ఊరూవాడంతా, పల్లెపట్టణమంతా దద్దరిల్లింది. వెరసి దీపావళి సంబరాలు సంతోషం నింపాయి. దీపం వెలిగించిన చోట ఆరోగ్యం, ధనసంపదలు, శుభాలు, బుద్ధిప్రకాశం విరాజిల్లుతాయి. శుభకార్యాల్లో దీపం వెలిగిస్తే విజయాలు కలుగుతాయని, అది విజయ సంకేతమని పురాణాలు చెబుతుంటారు. ప్రతి పనిని ప్రారంభించే ముందు దీపాన్ని వెలిగించి పూజ చేయడం ఆచారంగా వస్తోంది. లక్ష్మీదేవి జన్మదినోత్సవంగా భావించి పూజించడం ద్వారా విశేషఫలితం ఉంటుందని భక్తుల ప్రగాఢ విశ్వాసం. అందుకే ఉదయమే ఇళ్లను అలంకరించుకుని లక్ష్మీదేవికి ప్రత్యేకపూజలు చేశారు. నోములు, వ్రతాలు ఆచరించారు.
