సారథి న్యూస్, సూర్యాపేట: సూర్యాపేట జిల్లాలో కరోనా పాజిటివ్ కేసులు రోజురోజుకూ పెరుగుతుండడంతో ముఖ్యమంత్రి జిల్లాపై నజర్ పెట్టారు. సీఎం కేసీఆర్ ఆదేశాల మేరకు బుధవారం సూర్యాపేటలో సీఎస్‌ సోమేశ్‌కుమార్‌, డీజీపీ మహేందర్రెడ్డి, వైద్య, ఆరోగ్యశాఖ ప్రత్యేక ప్రధాన కార్యదర్శి శాంతికుమారి, ఐజీ స్టీఫెన్‌ రవీంద్ర పర్యటించారు. కరోనా వైరస్‌ వ్యాప్తికి కారణమైన మార్కెట్‌ బజార్‌ను పరిశీలించారు. అనంతరం కలెక్టరేట్లో కలెక్టర్‌ టి.వినయ్‌ కృష్ణారెడ్డి, ఎస్పీ ఆర్‌.భాస్కరన్, జిల్లా అధికారులతో పరిస్థితిపై సమీక్షించారు. అనంతరం సీఎస్‌ జిల్లా పరిస్థితులపై మీడియా ప్రతినిధులతో మాట్లాడారు. సూర్యాపేటలో ఇప్పటివరకు 83 పాజిటివ్ కేసులు నమోదయ్యాయని వెల్లడించారు. పరిస్థితి త్వరలోనే కంట్రోల్ లోకి వస్తుందని ఆశాభావం వ్యక్తంచేశారు. డీజీపీ మహేందర్రెడ్డి మాట్లాడుతూ.. సూర్యాపేట జిల్లాలో పాజిటివ్ కేసుల తీవ్రత ఎక్కువగా ఉన్న నేపథ్యంలో సీఎం కేసీఆర్ ఆదేశాల మేరకు క్షేత్రస్థాయిలో సందర్శించామన్నారు. ఇరుగు పొరుగు ఇళ్లవాళ్లు కూడా కాంటాక్ట్ లో ఉండకూడదన్నారు.
