హిట్, ప్లాప్ లతో సంబంధం లేకుండా సుప్రీమ్ హీరో సాయిధరమ్ తేజ్ జెట్ స్పీడ్ తో సినిమాలు చేస్తున్నాడు. రేపు ‘సోలో బ్రతుకే సో బెటర్’ విడుదలవుతుండగా గురువారం కొత్త సినిమా పూజా కార్యక్రమాలతో ప్రారంభించాడు. మిస్టికల్ థ్రిల్లర్ కథాంశంతో రూపొందనున్న ఈ చిత్రానికి ‘భమ్ బోలేనాథ్’ ఫేమ్ కార్తీక్ వర్మ దండు దర్శకత్వం వహిస్తున్నాడు. స్టార్ డైరెక్టర్ సుకుమార్ స్క్రీన్ ప్లే అందిస్తున్నాడు. శ్రీ వెంకటేశ్వర సినీ చిత్ర బ్యానర్ పై బీవీఎస్ఎన్ ప్రసాద్, సుకుమార్ రైటింగ్స్ పతాకంపై సుకుమార్ కలిసి ఈ మూవీని సంయుక్తంగా నిర్మిస్తున్నారు. సాయి తేజ్ తన కెరీర్ లో మొదటిసారిగా మిస్టికల్ థ్రిల్లర్ జోనర్ లో నటించనున్నాడు. ‘సిద్ధార్థ నామ సంవత్సరే.. బృహస్పతి: సింహరాశౌ.. స్థిత సమయే.. అంతిమ పుష్కరే’ అంటూ అనౌన్స్మెంట్ పోస్టర్ లోనే ఇదొక డిఫరెంట్ కాన్సెప్ట్ తో రూపొందే సినిమా అని హింట్ ఇచ్చారు. మరి తేజ్ కు ఈ #SDT15 ఆధ్యాత్మిక థ్రిల్లర్ ఎలాంటి ఫలితాన్ని ఇస్తుందో చూడాలి. భారీ బడ్జెట్ తో తెరకెక్కనున్న చిత్రానికి సంబంధించిన నటీనటులు సాంకేతిక నిపుణుల వివరాలు త్వరలోనే వెల్లడించనున్నారు.
