ఆస్ర్టేలియా స్టార్ పేసర్ ప్యాట్ కమిన్స్
సిడ్నీ: టీమిండియా నయా వాల్ చతేశ్వర్ పుజారాను ఈసారి ఎలాగైనా ఔట్ చేయాల్సిందేనని ఆస్ర్టేలియా స్టార్ పేసర్ ప్యాట్ కమిన్స్ అన్నాడు. అందుకోసం కొత్త మార్గాలు వెతుకుతున్నానని చెప్పాడు. గత సిరీస్ ప్రదర్శనను మరోసారి పునరావృతం చేయనివ్వబోనని స్పష్టం చేశాడు. ‘సాధ్యమైనంత వరకు పుజారా ఎక్కువసేపు క్రీజులో ఉండడానికి ప్రయత్నిస్తాడు. బ్యాటింగ్లో ఆందోళన చెందడు. ఈ ప్రత్యేకత వల్లే పరుగుల వరద పారిస్తున్నాడు. అందుకే మేం అతన్ని ఔట్ చేసేందుకు ప్రత్యేక ప్రణాళికలు సిద్ధం చేసుకుంటున్నాం.
గత పర్యటన మాదిరిగా ఈసారి జరగనివ్వం. ఇందుకోసం పిచ్లను మార్చాల్సిన పని కూడా లేదు. కొత్తగా వేటిని తయారు చేయాల్సిన అవసరం లేదు. మా బౌలింగ్తోనే, మాకున్న వనరులతోనే పుజారాను ఔట్ చేసేందుకు ప్రయత్నిస్తాం. ఇందులో కచ్చితంగా విజయం సాధిస్తాం. మా వద్ద మరిన్ని కొత్త అస్ర్తాలను సిద్ధంగా ఉన్నాయి’ అని కమిన్స్ పేర్కొన్నాడు. కెరీర్లో తాను ఆడే ప్రతి టెస్ట్ నుంచి ఏదో ఓ కొత్త విషయాన్ని నేర్చుకుంటున్నానని చెప్పాడు. కొన్ని సందర్భాల్లో టెస్ట్లు బోర్ కొట్టించినా.. మరికొన్ని సార్లు అద్భుతమైన పాఠాలు నేర్పుతాయని చెప్పాడు.