సారథి న్యూస్, హుస్నాబాద్: సిద్దిపేట జిల్లా చేర్యాల పట్టణ ప్రధాన రహదారులు చెరువులను తలపిస్తున్నాయని సీపీఐ జిల్లా కార్యవర్గ సభ్యుడు అందె అశోక్ అన్నారు. ఈ సందర్బంగా శనివారం ఆయన మాట్లాడుతూ గత కొద్ది రోజులుగా కురుస్తున్న భారీవర్షాలకు చేర్యాల పట్టణంలోని రోడ్లన్నీ నీటితో నిండిపోయాయన్నారు. రహదారి వెంట అక్రమార్కులు నాలాలను కబ్జా చేయడం ద్వారా డ్రైనేజీ వ్యవస్థ పూర్తిగా అస్తవ్యస్తంగా మారిందన్నారు. మున్సిపల్ అధికారులు, పాలకమండలి సభ్యులు నాలాలను క్లీన్ చేయడం, కబ్జాలకు గురైన స్థలాలను గుర్తించి చర్యలు తీసుకోవడంలో యంత్రాంగం పూర్తిగా విఫలమైందని ఆరోపించారు. ఇప్పటికైనా మంత్రి, ఎమ్మెల్యే స్పందించి నాలాలను కబ్జా చేసిన వారిపై చర్యలు తీసుకోవాలని లేని పక్షంలో సీపీఐ ఆధ్వర్యంలో ఆందోళనకు దిగుతామని హెచ్చరించారు.
